الحوار المتمدن - موبايل
الموقع الرئيسي


جلسات نفسية 10

عادل ندا

2011 / 1 / 17
الفلسفة ,علم النفس , وعلم الاجتماع


الجلسة السابعة عشر: العجز
المريض: الدكتور قالى ما عنديش أى سبب عضوى للى بشتكى منه ده.
الدكتور: بتشتكى من العجز الجنسى فقط؟
المريض: معنديش ولا ضغط ولا سكر، ولاباخد أى علاج.
الدكتور: وآخر مرة مارست الجنس طبيعى، كان أمتى؟
المريض: لما كنت فى العشرينات.
الدكتور: كنت منطلق بقه.
المريض: ما كنش فيه مسئوليات.
الدكتور: أنت بتشتكى من العجز الجنسى فقط؟
المريض: تقصد أنى عندى إحساس بالعجز، فى حاجات تانية؟
الدكتور: الأنظمة والمفاهيم لازم تتطور وبحرية.
المريض: لما بقعد لوحدى ببقى مكتئب، ولما ببقى مع ستات أو بشرب ببقى شخصية تانية.
الدكتور: الواحد لما مايكنش قادر على انه يسيب نفسه، أمام الآخر، بيعمل حاجز نفسى.
المريض: بكذب على نفسى. كتير بقول لها، انا مش محتاج ستات. ولما أحتاجهم، أبقى أمارس العادة السرية.
الدكتور: أنت محدد أنت عايز أيه من مراتك؟
المريض: هى ما عندهاش اللى أنا عايزه. الستات بقت رجالة.
الدكتور: أنت بتشرب خمور؟
المريض: ما بسكرش وعشان كده الخمرة بالنسبالى مش حرام. دواء.
الدكتور: أنت بتعرف ترقص أو تغنى أو ترسم؟
المريض: الرقص عيب يا دكتور والموسيقى حرام.
الدكتور: مكتف نفسك. يا راجل روح العب رياضة، أو أحضر ذكر أو زار، او العب تحطيب. لو ما استمتعتش بحاجات تانية، ها يستمر العجز، وتعجز بجد. سيب نفسك شوية.

المريضة: باتألم يا دكتور. كنت حاطة امل كبير على العلاقة بسامى، وبرضه فشلت.
الدكتور: اهم شيئ فى العلاقات الواقعية.
المريضة: كان خلاص ها يطلب أيدى للجواز.
الدكتور: إذا كنتى لا تستطيعين رؤية نفسك من خلال منظور الآخر فلن تفهميه.
المريضة: أنا الظاهر عندى أزدواج فى الشخصية.
الدكتور: العلاقات محتاجة صبر وتحمل وتنازلات.
المريضة: لما بقعد لوحدى ببقى شخصية، ولما ببقى مع راجل ببقى شخصية تانية.
الدكتور: الواحد لما مايكونش قابل أنه يتعرى، أمام الآخر، ده بيعمل حاجز نفسى.
المريضة: وبرضه بكذب على نفسى. كتير بقول لنفسى، انا مش محتاجة راجل. أنا أسعد لوحدى.
الدكتور: أنت محددة أنتى عايزه أيه، من اللى هاتتجوزيه؟
المريضة: بيقولوا ضل راجل ولا ضل حيطة. الرجالة ما بقتش رجالة يا دكتور.
الدكتور: بتعرفى ترقصى أو تغنى أو ترسمى؟
المريضة: الرقص عيب يا دكتور والموسيقى حرام.
الدكتور: مكتفه نفسك.

الجلسة الثامنة عشر: الإدعاء وخداع الذات
المريض: نفسى أمارس الفساد يا دكتور. عشان أبقى زى الباقيين.
الدكتور: المسألة نسبية والكل فاسد بدرجة ما، وشكل ما.
المريض: رحت أتعلم التمثيل عشان أعرف أكذب. المخرج قالى منفعش.
الدكتور: أنت مقتنع بنسبة كام بالكلام اللى بتقولهولى ده؟
المريض: طول عمرى أهبل، واللى فى قلبى على لسانى.
الدكتور: ايه رأيك أنى مش مصدقك.
المريض: الفاسد هو اللى بيعرف يلف ويدور، لغاية لما يحصل على اللى مش من حقه.
الدكتور: الناس بتكذب على نفسها، لغاية لما تصدق نفسها. وتعيش الدور.
المريض: مرة كذبت على شحات فى الشارع بيستعبط، وقولتله مامعييش فلوس. حسيت انى حقير وجبان.
الدكتور: أنت عايش دور بس مشكلتك، أن الدور اللى رسمه لنفسك، مش مريحك.
المريض: من بكرة، ها أقبل وأمارس كل أنواع الفساد.
الدكتور: أنت جاى تاخد منى تصريح، عشان مش عايز تتحمل مسئولية إختياراتك.





التعليق والتصويت على الموضوع في الموقع الرئيسي


اخر الافلام

.. إسرائيل تهدد بحرب واسعة في لبنان وحزب الله يصر على مواصلة ال

.. المنطقة الآمنة لنازحي رفح | #غرفة_الأخبار




.. وثيقة تكشف تفاصيل مقتل الناشطة الإيرانية نيكا شكارامي عام 20

.. تقرير إسباني: سحب الدبابة -أبرامز- من المعارك بسبب مخاوف من




.. السعودية تسعى للتوصل لاتفاقيات شراكة أمنية مع الولايات المتح