الفيسبوك
التويتر
اليوتيوب
الانستغرام
لينكدإن
تيلكرام
بنترست
بودكاست
الحوار المتمدن
- موبايل
الموقع
الرئيسي
قبل ما تثور عالحكومة..
صابرين عبد العزيز
2011 / 1 / 25المجتمع المدني
المقال دة موّجه لزملائي في الوطن ابناء الشعب المصري وتعمدت كتابته بالعامية المصرية ونشره بعد حوار الثورة المزعوم "25 يناير" ما يخلص، عشان تروحوا تغيروا البلد وترجعوا لنا بألف سلامة من غير ما مقالي التافه يعطل اي منكم عن حماسه
وحتى لا ابدو وكأني احاول احباط الشعب عن التظاهر (على اساس ان الشعب كله يعني هيقرا المقال دة)،،
او كي لا ابدو وكأني اتخذ صف الحكومة (تهمة شنعاء ولازم ابرأ نفسي منها طبعا) ماهو مافيش انسان سوي ممكن يدافع عن الحكومة المصرية، ولا عن رئيس مصر "تقدس اسمه وتباركت صفاته" ..
اصل فعلا مافيش دولة محترمة ممكن تفضل تحت حكم نفس الشخص 30 سنة (عمر حكمه من عمري انا شخصيا)، حتى لو مَلاك مافيهوش غلطة، نازل من السما يحكمنا، ماكانش حد هيستحمل يشوف نفس سِحنِته -أقصد الملاك طبعا- في كل الجرائد صفحة اولى يوميا، وصور جنابه في جميع الدواوين الحكومية، واسمه بيتردد هبلتلاف مرة في اليوم في جميع وسائل الاعلام (المرئية والمسموعة والمقروءة والمبصوقة) لمدة 30 سنة يا عالم يا هوووووووووه، ماهو طبعا لازم الناس تتظاهر وتثور، حتى لو مش ناقصهم اي حاجة، ولو من باب الملل
انا مش ضد ان الناس تثور لحقوقها، تثور لحريتها، تثور للقمة العيش، تثور طلبا للعدالة، للديموقراطية، لتفعيل مواثيق حقوق الانسان، انا بس بطلب منكم تكونوا منطقيين.. نفسي اصدقكم
... مثلا
*يعني ايه واحد عنصري يثور لطلب العدالة؟
وليل ونهار بمناسبة ومن غير مناسبة بيردد في جمل بتنقّط تخلف وجهل وضلمة من عينة : ـ
ـ"مصر بلد اسلامية واللي مش عاجبه من المسيحيين يروح يعيش في سويسرا"ـ
ـ" المرأة ناقصة عقل ودين والرجل هو ولي امرها، لازم تسمع كلام الراجل وتلبس على مزاج الراجل وتخرج وتطلع بإذن الراجل"ـ
ولو ماتحجبتش يبقى تستاهل التحرش، ولو ماتجوزتش تبقى عانس وبايرة، ولو اتجوزت واتطلقت تبقى معيوبة ولو اترملت تبقى فقرية وبومة
ـ "البهائيين واللادينيين دول كفرة ولاد كلب (قال يعني كنتم بتحترموا اوي اليهود والمسيحيين) يستاهلوا الحرق هي البلد ناقصة الاشكال الوسخة دي؟! داحنا عمر ربنا ما هيرضى علينا طول ما بنسمح للكائنات دي انها تنمو وسطنا"ـ
وبعد دة كله جاي يعمل فيها ثورجي ويتظاهر طلبا للعدالة؟
مش دي مصطلحاتكم؟ مش دة "لسانكم الجمعي"؟
دة انتم الجحيم بذاته! دي الحكومة بكل "عبلها" مابتعملش فينا قد ماحنا بنعمل في بعض.. والمصيبة ان دة مش مطروح للنقاش ولا فيه محاولة حقيقية لتغييره والثورة عليه،، كل عاهاتنا حطينها في بؤجة ومسميينها بإسم " الخصوصية الشرقية" ودايرين نتفاخر بيها، دة احنا مش بس مانستاهلش نعيش في بلد نضيفة، الحقيقة ان احنا ماكناش نستاهل ندخل الالفية التالتة ولا التانية حتى، يعني الحكومة لو خلصنا منها، غبائنا مين يخلصنا منه؟ ماحدش ممكن ينقذك من تخلفك الحضاري غيرك انت
*يعني ايه واحد تنبل مانزلش فحياته يدور على شغل غير وهو فوق العشرين ورايح قال يثور طلبا للاصلاح الاقتصادي وبيتكلم عن البطالة؟
مانت لو من وانت طالب في ثانوي نزلت في الصيف تشتغل (زي ما بيحصل في اوروبا والدول المتقدمة) تغسل اطباق وللا تبيع جرايد وللا تقف في اي محل، كان زمانك اتعلمت ازاي تشوف شغل وتلاقي شغل وكان زمانك محوش قرشين تبدأ بيهم مشروع صغير كمان! مابقولش ان مافيش مشكلة ولا ازمة فرص عمل، بس الازمة دي انت جزء منها بسلوكك، عملت ايه وبنيت نفسك ازاي عشان تستحق فرصة شغل كويسة؟ استسلمت لمنظومة الغباء العربية.. كنت قد الشحط وبتاخد المصروف من اهلك اللي هما عمرهم برضه ما ثاروا عشان يغيروا العته اللي عايشين فيه، والعمر والفلوس اللي رايحين هدر على التعليم العالي اللي مابيزيدناش الا جهل، لو كانوا حوشوا فلوس الدروس الخصوصية في الثانوية العامة -لوحدها بس- وساعدوك بيها تبدأ اي مشروع على قدك ماكانش زمانك عاطل دلوقت، ما تثور على اهلك اللي مشيوا مع القطيع بلا تفكير! ثرت عليهم؟؟
*يعني ايه واحد خانع تابع، عمره فحياته ما تجرأ يثور على تسلط اهله ولا على قهر وظلم وبلطجة مدرسينه في المدرسة ولا دكاترته في الكلية، وجاي عايز تتشطر وتثور عالحكومة!؟
زعلان اوي ان مصر بقالها تلاتين سنة ماحكمهاش غير رئيس واحد؟ طيب ما تثور الاول على الاحادية الدينية (اسلامية اسلامية اسلامية) ويا ريتها بس اسلامية انما اسلامية وجواها (سنة سنة سنة)، ثور يا اخي حتى على الاحادية الرياضية (كورة قدم كورة قدم كورة قدم) وياريتها كورة قدم وجت على كدة، حتى الفريق اللي بيكسب هو واحد على طول ( اهلي اهلي اهلي) وكل دة ولسة اول الماتش ما يبدأ تلاقي الشوارع فضيت!! دة انتم شعب املّ من الملل ذاته! علية النعمة ان الحكومة مسلية عنكم
بدل ما تفرح انك تبع فريق الاغلبية وتزؤل الفريق التاني بالطوب زي "الشوارعية"، لازم تثور عشان تكافؤ الفرص في كل المجالات بدءا من سياسة البيت ومعاملة اهلك لك ولأختك او ليكي ولأخوكي،، ومرورا بمعاملة استاذ الجامعة والتفرقة في الدرجات بين المحجبات وغير المحجبات وبين الطبقات الاجتماعية المختلفة،، نهايةً بفرصة شغل راحت منك عشان مامعكش واسطة،،،
لو عايزين فعلا تقوم لنا قومة يبقى مانسمحش بفرض الرأي في اي مجال حتى لو بينصر رأيك، ماتسمحش بالتمييز والاضطهاد ضد الاقليات حتى لو انت من الاغلبية
التفاصيل الصغيرة والسهل السيطرة عليها وقت حدوثها هي اللي مع تراكمها بتصنع الاحداث الجسام الكبيرة والصعب التغلب عليها بشكل فردي او حتى جماعي، ازاي بتسيب الصغيرة تعدي وعندك امل تحل الكبيرة؟
لازم نفهم ان الفريق الواحد والحزب الواحد والدين الواحد هو اللي بيجيب الرئيس الواحد
ـ (لحد ما تموتوا مش هتشوفوا غيره واعتبروا دة وعد!)ـ
لما تثور على نفسك وتنتصر لضميرك في تفاصيل حياتك اليومية، يبقى تستاهل ساعتها تتعامل كمواطن وكإنسان
انما طول ما بتسكت عالظلم عشان مش انت المظلوم تبقى في مرتبة ادنى من الانسان ولا تستحق كل ما يستحقه الانسان من حقوق، وطول ما بتستسلم للي ظلمك ضعفا وجبنا يبقى لن ترقى لمرتبة الانسان،، المواطن ،، الثائر
دي كانت مجرد نصيحة مني واتمنى لو تأثر ولو في فرد واحد من التمانين مليون.
|
|
التعليق والتصويت على الموضوع في الموقع الرئيسي
التعليقات
1 - واحد من التمانين مليون
ريد دبليو
(
2011 / 1 / 25 - 09:05
)
الاخت المصريه صابرين... أنت أكثر من رائعه في كلماتك العاميه ... إختلط ضحكي بدموعي ومش متأكد هل كنت فرحان أو حزين علي مصر فيها زى صابرين وفاطمه ناعوت أو تايهه ومتخبطه بحكومه ومتأسلمين حيودونا ورا الشمس... أرجو أن تكتبي أكثر ... وبالعاميه
2 - حديثي مع رجل يحب الثورة
مارا الصفار
(
2011 / 1 / 25 - 10:37
)
تحياتي عزيزتي
اختصر لك حديث احدهم (بلدياتكم) معي عن طلب المصريين للتغيير والثورة
حيث قال :
لما تلاقو تاكلو وتشبعو وترمو عظمكوم
ابقى بعدين سورو زي مانتو عاوزين
تسورو وانتو جاعانين ازاي ؟
ثم ختم الحديث قائلا :
عالم تستاهل الحرء
عالم ما بتشبعش
يا ابني كول رزقك واسكت
آل سورة آل
نظرت اليه طويلا ... ولم استطع التعليق
3 - اعشق صدقك مع ذاتك
Ulla _Hamsa
(
2011 / 1 / 26 - 17:22
)
صابرين الغالية....اعشقك بجنونك وخفة دمك وعذوبة انسانيتك كما اعشق اخلاصك لقيمك وافكارك وقدرتك على التزام الموضوعية في التعبير عن ارائك التي اتفق معك في اغلبها
ولكن اكثر ما اعشقه فيك فوق كل هذا وذاك هو صدقك مع ذاتك
المقال اكثر من رائع وقد افصحت من خلاله عن افكار كانت تزدحم براسي منذ الامس وما جرؤت ان اطرحها علناً لكوني لست مصرية ولاني لا زلت شديدة الحساسية تجاه ما كنت اعانيه نفسيا وعصبيا يوم كان الكثيرون من غير العراقيين من مواطني شرخنا الاوسخ يتطوعون للتنطع والنقاش في ادق تفاصيل الشان العراقي حتى بت اخشى على نفسي من الموت ناقصة عمر بسبب تحليلاتهم الخزعبلية وهو ما دفعني لالتزام الصمت غالبا والتعليق بحذر شديد نادراً حين يتعلق الامر بمكان لا اعيش فيه وزمان لم اشهد احداثه بنفسي
لك كل محبتي واحترامي واعجابي بما تخطه اناملك
:)
4 - مغالطات
محمود عتمان محمد
(
2011 / 1 / 27 - 10:51
)
مقالك يحمل كثير من المغالطات
زى مثلاً انتى بتنتقدى اللى منزلش اشتغل وهو طالب زى الاوربيين
اقولك وهى ثقافتنا دى اكتسبناها منين ماهو من هذا النظام الفاشل
بتنتقدى اللى عمره ما ثار على مدرسه او اهله لما ظلمه
اقولك يا ستى عندك حق بس ادينا اهوه قررنا نثور ومش معنا انى عمرى ماثورت قبل كده تحرمى عليا ان اثور .. توبت يا شيخه وربنا بيقبل التوبه
5 - سوف أثور وكلامك ملئ بالمغالطات
محمود عتمان
(
2011 / 1 / 27 - 10:57
)
مقالك يحمل كثير من المغالطات
مثل انك تنتقدى الشاب الذى لم يعمل وهو طالب مثل الاوربيين
ارد واقول لكى ان ثقافتنا هذه مِن مَن اكتسبناها؟
اليس من هذا النظام
حضرتك بتنتقدى كل شخص لم يسبق له ان ثار على مدرسه او اهله عندما ظلمه
اسمحى لى ارد واقولك انك تملكين الحق فى هذا ولكنه ليس مبرر لكى تنتقدى ثورتى .. وهذا لا يعطى لكى الحق فى ان تحرمى عليا ان اثور .. فلتعتبريها توبة من ذنب
الا يقبل الله توبة؟
6 - فعلا كلامك ملئ بالمغالطات
زينة محمد
(
2011 / 2 / 10 - 11:06
)
اعجب لمن يتحدث عن شئ لا يفقه عنه شيئا اول شي هذا المو متنبل الاوربي من ساعة امه ما تصير حامل بيه الى ان يصير عمره 18 سنة رعايته الصحية والدراسية على حساب الدولة اضافة الى راتب مخصص له من الدولة بغض النظر عن حالة والديه المادية فهاي سالفة غسل الصحون وبيع الجرايد فهاي بامريكا مو اوربا وكذلك باوربا اذا كنتي عاطلة عن العمل الدولة تصرف لك راتب وتحاول قدر الامكان ايجاد الكورسات والعمل لك وكله على حساب الدولة وباعتبارك تتحدثين عن اوربا فلو قارنتي النظام الاوربي فهو قريب جدا من النظام الاسلامي من الناحية الاقتصادية والمعاملة وغيرها من اشياء لكن ليس ذنب الاسلام التطبيق غير الصحيح له ولما تتحدثين عن الحرية والتعبير عن الرأي اني وغيرك من المعميين على ابصارهم فاعتقد انه الحرية تكفل لملايين المسلمين انه يكونون مسلمين وتكفل عدم انتقادهم من ناس جهلة يعتقدون انفسهم فوق الاديان وانه على اساس وصلوا لمرحلة دارون الغبي
لذلك فلا توجد مقارنة بين المواطن العربي المغبون الحق والمواطن الاوربي المدلل
7 - كلام مردود عليه
عماد المصري
(
2011 / 3 / 2 - 15:32
)
كلامك كلو مردود عليه وملئ بالمغالطات وهدفة الرئيسى الخوض فى الدين ونشر الافكار العلمانيه التى لا اساس لها
عجبت لكم ايها العلمانيون العرب
.. ليبيا.. المؤسسة الوطنية لحقوق الإنسان تصدر تقريرها حول أوضاع
.. طلاب جامعة السوربون يتظاهرون دعما لفلسطين في يوم النكبة
.. برنامج الأغذية العالمي: توسيع العملية العسكرية في رفح سيكون
.. الأونروا: الرصيف البحري المؤقت لا يمكن أن يكون بديلا للمعابر
.. كل يوم - خالد أبو بكر: الغذاء ينفد والوقود يتضاءل -المجاعة س
