الحوار المتمدن - موبايل
الموقع الرئيسي


الشعب ساكت عليهم ليه ...

أسعد أسعد

2012 / 2 / 3
العلمانية، الدين السياسي ونقد الفكر الديني


تصوروا إن هذا كلام سيادة المشير طنطاوي في تعليقه علي أحداث بورسيعيد ... و لأن المشير مشغول في إدارة مزارع البيض و الفراخ و البط البقر و المعيز ... و تسويق منتجات المصانع الحربيه من أدوات المطبخ و التلاجات و البوتاجازات و عربيات الأطفال ... فالمشير مش واخد باله إنه هو المسؤل عن أمن مصر و سلامة الشعب المصري ... أو بصراحه هوه مطنش ... المشير إقتصرت عقليته غلي بيع البيض و الجبنه و حلل الألومنيوم ... و لأن المشير بيقعد كتير قدام التلفزيون المصري أصبح مخه متعبي بالبرامج التافهه و المذيعين اللي أي كلام فما كان منه إلا إنه إتبع نفس فلسفة الست رشا و طلب من الشعب إنه يقوم بواجبه و يدافع عن الجيش اللي مش لاحق يعمل حاجه من كتر الشغل في لم البيض و حليب البقر و الجاموسس ...
سيادة المشير إتخض من شوية العيال البورسعيدية اللي هجموا علي شوية العيال الأهلويه إللي جايين من مصر ...و لما لقي نفسه مش عارف يعمل حاجه في شوية العيال ...و إنه مش في مستوي إنه ينزل يشوف العيال دي بتتخانق ليه و علي إيه ... أو لأنه بصراحة إنبسط إن البلد بتولع بعيد عن قفاه ... قال أولعها زياده و إقترح علي الشعب المصري هذا الإقتراح الرهيب إللي معناه إن المصريين يعملولوا فرقة صاعقه قطاع خاص و يروحو هيلا هوب يهجموا علي العيال بتوع بورسعيد و يقتلوا منهم ميه و الا ميتين و ياخدوا بتار العيال الأهلويه اللي ماتوا و تبقي إتحلت المشكله ... عيال بتموت عيال ... شعب تافه و أنا مكبر دماغي مش كفايه عليّ زرايب البقر و عشش الفراخ و ورش النجارة و مسؤليتها الكبيره إللي علي دماغي .. كمان ها أدور علي مين ضرب مين و مين قتل مين ... ما تولع بجاز ...و علي كل حال أديني شلت الجاز من السوق علشان ما يعرفوش يولعوا في بعض ...

و الحقيقة يا قارئي العزيز ...أنا في رأيي إن هذه العبارة هي أخطر كلمة تمثل فلسفة حكم العسكر في الفترة التي تمر بها مصر حاليا ...كلمات المشير ليست مجرد كلمات عفويه ... إنها كلمات تعبر عن مبدأ نظام الحكم العسكري لمصر ... التي تفسّر بمعني واحد ... خليها تولع ...و بمعني و ببعد آخر يمكن تفسير كلمات المشير البسيطه و الهايفه علي إنها كلمة السر أو الأوامر السرية لبداية مذبحة أو مذابح تأديب الشعب المصري ...

البعض يطالب بإقالة المحافظ و مدير الأمن ... طيب و ما رايكم في كلمات المشير نفسه ... أعلي سلطة في البلاد الآن ... بالمناسبه اليس كلام المشير يحمل نفس التعبير أو الرأي الذي قاله مبارك عن المشاكل السياسية في مصر عندما قال .. خليهم يتسلوا ... مبارك هو المشير ... و المشير هو مبارك ...

الإخوان ما بيفوتوش فرصة من غير ما يستغلوها ... فأفتي ممثل الجماعة الإسلامية في بيان عاجل ... إن هذه الأحداث هي فرصة بأن يسلّم الجيش الحكم لحكومه مدنيه ... يعني للإخوان ... و طظ في مصر ...

ثلاث قوي تتصارع الآن علي مصر ... ثلاث ذئاب... العسكر ... و الوطني المنحل ممثل في الحكومة التي ما نزال نري وجوهها في كل وزارة ياتي بها المجلس العسكري من شفيق ... لشرف ... للجنزوري ... دول صفوف الدرجه الأولي يعني الواجهه ... أما صفوف الدرجة التانيه و التالته اللي هما المدبر والمخ و المنفذ الحقيقي فما زالوا قاعدين في مراكزهم و هؤلاء بيشتغلوا بعيد عن الأضواء ... و الذئب الثالث الإخوان في المجلس و خارج المجلس بذراعهم السياسي و الإعلامي و العسكري ... و هؤلاء الذئاب الثلاثة – العسكري و الوطني و الإخوان - يريدونها ميته ... كل واحد من التلاته دول عايزيستلم مصر جثة علشان يبنوها بمزاجهم و علي هواهم ... و السبب هو صحوة مصر الفجائية إللي لا عايزه عسكر و لا إخوان و لا وطني... شباب الثورة التي تعلم أمريكا أنهم لا يملكون أي قوة يمكنهم بها أن يفرضوا إرادتهم في تغيير مصر ... لا يملكون الرؤيه و لا الخبره و لا المال و لا السلاح ... لا يملكون سوي الرفض و الثورة علي المهازل التي تحدث في مصر ... وهؤلاء لا يملكون سوي وقود الألم و الدم ... دمهم الذي يسيل ليؤجج المزيد من الثورة فتحصدهم رصات فلول الحكومة و الوطني و تبتلعهم سجون العسكر و تنهشهم ثعابين الإخوان التي تقنع الكل بأنهم هم المارقون علي شرعية النظام و إنهم لم يكونوا أبد ثوار بل هم الكفار ...

و الغريب إن بالرغم من كل ما يحدث في مصر فالعسكر و الوطني و الإخوان ينسبونه لمؤامرة و أيادي خارجية ... و لا أحد فيهم إستطاع أن يقدم و لو مرة واحدة أي شخص تم القبض عليه و تبين أنه قبض من أي جهة ليفعل ما يفعله ... و التلاته الحراميه دول بيتجنبوا إتهام بعض ... لا العسكر بيتهموا الفلول و لا الإخوان ...و لا الإخوان بيتهموا العسكر مع إنهم بيلمحوا للفلول ... و الفلول صامتين صمت الأفاعي و التعابين ... الفاعل دائما مصري ... الصور تبين هذا ... الهياج مصري ... الشغب مصري ... الإنفلات مصري ... القاتل مصري و المقتول مصري ... و لا أحد يعرف من الذي يدفع و لا من الذي يقبض ...

مصر ها تولع فعلا ... الجيش لا يمكن أن يقبل برئاسة مدنية ... ميزانية الجيش مجرد رقم في الميزانية العامه لا يقبل التفصيل و لا المناقشة ... الجيش عمله عبد الناصر علشان يبقي سيد البلد ... سيد الناس كلها ... جزمة أصغر ظابط برقبة كل الشعب المصري ... بما فيهم ظباط البوليس ... الجيش يملك السلاح و القوة علي القتل في أي وقت ... الجيش يعطي أوامر و لا تناقش ... فهل يترك الجيش كل هذا الهيلمان ... ليعيش تحت إرادة الشعب ... الجيش ينظر للشعب إنه مجرد غوغعاء دهماء و حثاله ...
نظرة الجيش للحكومة و مافيا الحزب الوطني ... إنهم المجموعة التي تسهل رفاهية الجيش ... منتجعات الجيش السياحية و الترفيهية و مصايف و مشاتي الجيش ... تسويق منتجات الجيش من مصانعه الحربية .... تمويل مشاريع الجيش ... إدرة العمل السياسي في البلاد لصالح الجيش ... هما الواجهة اللي بتحمي الجيش سياسيا ... أما الإخوان فمهمتهم نشر ثقافة التسليم لله و قبول الأمر الواقع و عدم الخروج علي طاعة ولي الأمر ... نص الإخوان متعلمين في السجون و المعتقلات إنهم مش قد الجيش ... و نصهم اللي بره المعتقلات شافوا إن الجيش بتاع بزنس ... و يهمه إنه يفضل فوق الكل ... و بما إنه متنغنغ و عايش في يغمه ... يبقي رأيه مع رأي الإخوان ... طظ في مصر ...

أمريكا أس الفساد ... مسيطره علي الجيش و علي الحزب و حكومته و علي الإخوان ... و الكل بيدبح المصريين ... و المصريين ها يكون قدامهم حل من إتنين و ده إللي عايزاه أمريكا ... يا إما نموت كلنا لأن ما معناش سلاح و ما معناش فلوس و أكلنا و شربنا و سكنا كله في إيدين الجيش و الوطني و الإخوان ... و ها نفضل في ثورة بالروح بالدم لغاية ما تطلع الروح و يسيح الدم ... أو نركع علي رجلينا و نقول لأمريكا تعالي يا تحتلينا يا تقسمينا يا تشوفيلك حل فينا ... و ده إللي عملته أمريكا بالضبط مع العراق ...
أنا رأيي ... الشعب كله يدخل بيته و يقفل علي نفسه و يحاول يحمي نفسه بأقصي ما يمكن علشان الأيام تعدي ... و ساعتها لما تفضي الشواع ها ينكشف أمر الديابه إللي بينهشوا في لحم مصر ... الجيش ها يبطش بالإخوان ... و الإخوان ها يشغلوا أساليب الإغتيالات و الوطني ها يشغل جماعات الفوضي المستأجره ضد مصالح الإخوان و الكل ها يضرب في بعضه ... و الدم اللي ها يسيح ها يكون دم المصلحجية و المأجورين و بياعين مصر و اللي بيقولوا طظ في مصر ... اللي هايغلب في المذبحة دي طبعا ها يكون الجيش لأن هو اللي بيملك القوة الضاربه و السلاح مش شوية البنادق و المسدسات ... الإخون إما هايموتوا أو ها يتوبوا أو ها يهربوا للسعوديه .. و الحزب الوطني ها ياخد فلوسه و فلوله و هدومه و يسيب مصر و اللي فيها و الباقي هايقبض عليه الجيش و يعمل محاكمات عسكريه و يعدمهم ... ساعتها الجيش ها يكون كشف نفسه قدام العالم كله ... إما ها يفوق و تحل عليه روح الوطنيه و يسلم البلد للشعب المكافح المسالم الثائر و يرجع متواضع في خدمة الشعب ... أو ها تركبه العنطظه ... و يقول أنا و بعدي الطوفان ... و تبتدي العقوبات الدوليه ضد مصر .. و المحاصرة الإقتصادية لمصر... و العالم كله يقف ضد مصر ... و ساعتها أمريكا تنفذ المخطط إللي إتمرنت عليه في العراق و تخرب مصر ....
مطلوب من عقلاء مصر سحب الشباب و المظاهرات من شوارع مصر ... إكشفوا ذئاب مصر ... كوّنوا إجتماعات سياسية ... إعملوا تنظيم سياسي يكون مستعد لقيادة مصر .... شكلوا مصر من جديد ... علي الورق .. بالتخطيط ... إعملوا وزارات في الظل ... إعملوا رياسه في الظل .... إتركوا الشارع للشوارعيه ... إللي ها يحصل لازم ها يحصل ... مش ها تقدروا تعملوا حاجه ... الدمار لازم ها يحصل ... بلاش تروحوا إنتوا في الرجلين ... إنتم مخ بس لكن ما عندكمش عضلات ... الديابه الثلاثه ... عندهم عضلات بس .. لكن ما عندهمش مخ ... سيبوهم يموتوا بعض ... إنتوا الحياة إنتوا مصر الجديده ... من فضلكم ... حافظوا علي حياتكم ... عيشوا علشان مصر تعيش ... و بدل ما الديابه بتقول طظ في مصر .. خلينا كلنا نقول طظ في الديابه ... حتي لو كسروا مصر ها تفضل مصر عايشه طول ما إنتوا عايشين.





التعليق والتصويت على الموضوع في الموقع الرئيسي


التعليقات

1 - كفاكم فتن يا اهل الفتن
سلامة شومان ( 2012 / 2 / 3 - 20:57 )
والله انت بتقول اى كلام والسلام
يا عم اسعد اتكلم بعقلانية شويه انتم من تريدونها ولعة
عيب عليكم تتكلموا عن مؤامرة واضحة من الفلول ومن اتباع الحكم البائد
وترموا تهمكم لمن توغل صدوركم منهم
فوقوا وجمعوا و تعاونوا ولاتتفرقوا
خلوا قلبكم على البلد شوية وكفاكم فتن ومقالات تزيد البلاء
صدقونى كلامكم كله فشنك بكره تندموا على كلامكم الهايف ده
وبكرة هتعرف انك كاتب شارك فى الفتنة لما تعرف مين السبب فى حرق البلد
تحياتى


2 - سينهار التحالف الشيطانى قريبا
Amir_Baky ( 2012 / 2 / 3 - 22:37 )
تحالف العسكر و الفلول و الإخوان سينهار قريبا. فهؤلاء يضعون مصالحهم الشخصية فوق مصلحة مصر و شعبها. والآن الشعب فاق من الغيبوبة.

3 - أستاذ شومان إقرأ المقال قبل التعليق عليه
أسعد أسعد ( 2012 / 2 / 3 - 23:26 )
بما أنك تتكلم عن الفلول و تجاهلت العسكر تماما و طلبت مني بالمستتر توحيد البلد تحت سيطرة و سلطة الإخوان .... فأنا أعتقد إن الموضوعات دي كبيره عليك قوي ... بقي أنا يا راجل اللي عايز أولع البلد و أنا بأنصح كل الشعب المصري المخلص إنهم يحقنوا دمائهم و يتركوا الشوارع و يتفرغوا لتخطيط مصر الجديدة لأن دمائهم ستذهب هدر في الصراع القائم الآن بين العسكر و الإخوان و الفلول ... مش عاجبك إني بأنادي للمصريين بحقن دمائهم و تتهمني إني أنا الذي أنادي بحرق البلد ...
بأقولك إيه يا حاج شومان ... ما تخليك إنت في الصولان و الجولان في نقد الكتاب المكدس و نشيد الأنشاد و سفر حزقيال ... الحاجات اللي علي قدك ... الكلام عن الإخوان و ألاعيبهم ها يسبب لك صداع لا هايشفيك منه رضاع الكبير و لا بول البعير ... و أديك شايف الأعراض إللي عليك ... أقول يا شباب مصر إحقنوا دماءكم تقولي أنت عاوز تولعها ... طبعا إنت بتخالف و خلاص لأنك لاتريد أن تتبع اليهود و النصاري .. بعضهم أولياء بعض ... و بعدين إنت مالك و مال مصر ... طظ في مصر و اللي في مصر و اللي جابوا مصر ...

4 - ههههه ابو زبيبة عامل قلبه على مصر
بشارة خليل قـ ( 2012 / 2 / 4 - 06:49 )
اخي استاذ اسعد انت عارف مين هم اللي (انتو)؟ لأ وكمان شوشو ابو مسواك في دُبـ..ه بيهدد وبيقولك هاتندموا(يعني انتو المصريين) هههههه ذكرني بنكتة هاتندم يا جميل.للاسف لا مجال لسردها لان الرقيب لن يمررها (نكته قليلة ادب)ء

5 - عيال الاهلاوية والبورسعيدية
سلامة شومان ( 2012 / 2 / 4 - 10:19 )
اقرأ مقال ايه هو ده مقال
لما تقول عيال الاهلاوية وعيال البورسعيدية
مش العيال دول ومن فى سنهم من قاموا بالثورة يا اسعد افندى انت لسه عايش فى العنكهيه بتاعت الحكم البائد
العيال كبرت يا اسعد ومفهومهم اصبح اكبر بكثير من مفهومكم للحياة
مش كده والا ايه
وجبنة ايه وبيض ايه والجيش هو سبب وقف اغلب الفساد فى بلدنا اليوم ولا نسيتم ايام الثورة واللى حصل من البلطجية مين اللى كان ياتى مسرعا لوقف هذا الاجرام
لما الكل كان خايف من الهمجية والبلطجية والحرامية والهاربين من السجون مين اللى لحق كل ده نيستم كده بسرعة
والله انتم لاينفع معكم الا بلطجية العادلى واعوانه
على العموم شوية العيال دول منهم اللى خلوك اغلقت على نفسك بابك وخفت واتصلت بالاهل والاقارب والشرطة اللى معبرتش حد وقتها
ياراجل خد بالك من كلامك فهومحسوب عليك
وبعدين دخلت الاخوان فى الموضوع -هو كل ما يحدث حدث تدخلوا الاخوان ههههه دا انتم خايفين قوى كده من الاخوان ولا همه اعداء البلد عرفونا الاخوان حتى الان ماذا فعلوا لضرر البلاد اتحداكم ان تقولوا حاجة واحدة ثبتت على الاخوان ضد البلد
كفاية انهم لايردوا عليكم لان الحق يظهر ويبرؤهم دائما

6 - بشارة خليل
سلامة شومان ( 2012 / 2 / 4 - 13:06 )
موت بغيظك
الذبيبة من العمل الصالح تاتى
وليس الصليب المطبوع اكلشيه هههههه
وانا لااهدد يااستاذ انا اذكر ان ما تكتبوه يسبب الفتن والوقيعة وانتم لاتشعرون
وانا مسلم وارضى هى ارض الله فى اى مكان اجد ارضى وليس مصر بالتحديد فارض الله واسعة ولايعنينى اى ارض المهم ان اعبد الله فيها سواء امريكا سواء اليابان سواء مصر فالاسلام لاتحده حدود فارض الله اوطانى فالصين لنا والهند لنا والعرب لنا وارض الله كلها لنا وطن
تحياتى

7 - الأستاذ شومان مش عايز يقرا المقال
أسعد أسعد ( 2012 / 2 / 4 - 14:43 )
أنا مش قلتلك خليك إنت في سفر نشيد الأنشاد و حزقيال و الكتاب المزور و يسوع المضروب كام كف علي قفاه .... طيب الكتاب المقدس و قلنا معذور مش عارف يقراه ... لكن يبدو إن المصيبه أكبر .... سعاتك بتتهمني إني أنا إللي بأقول علي البورسعيديه و الأهلويه شويه عيال ... دا إنت حالتك مستعصيه خالص ... مش قلتلك لا هاينفعك بول البعير و لا رضاع الكبير إذا أصريت إنك تدخل في حاجات أكبر من دماغك
أنا يا أستاذ شومان يا جهبذ زمانك و صنديد أيامك ... أنا لم أدعو البورسعيدية و الأهلويه شوية عيال .... أنا بأعرض علي القارئ إسلوب تفكير المشير ... أنا بأقول للناس إن المشير بتصرفه هوه إللي بيقول علي الناس دي إنهم شوية عيال و الدليل إنه لم يهتم بهم
أنا أعتقد إنك كل ما بتقترب من أي شئ مسيحي حتي لو مش في مسأله دينيه بتروح علي طول واخد حبوب منع الفهم ... ياراجل ألم تفهم حتي القرآن الذي يقول إن بعض الظن إثم ... قبل ما تبعتر ظنونك و إتهاماتك علي الناس و الكتّاب .. بطل الهباب اللي بتتعاطاه ده ... قلبي معاك ... المره دي بجد مش بهزار ... إنت غالي عندي و أنا باحب أنكشك و أشاكسك ... إقرا المقال تاني بجد و قل لي رأيك ... بجد

8 - اسعد اسعد-سعيد بردك وكلامى عن الملعون
سلامة شومان ( 2012 / 2 / 4 - 18:41 )
لن تستطيع ان تبرر موقفك وكلامك
مهما قلت ومهما بررت فلن تستطيع شطب ما كتبته
لعلك كتبت امرا وفى ذهنك امرا اخر
على العموم هو ده فهمى وعقلى فاتخذنى على قد عقلى
شكرا لك

9 - ماشي يا عم شومان
أسعد أسعد ( 2012 / 2 / 4 - 20:16 )
خلاص ها أخدك علي قد عقلك ...حلوه منك علي قد سنك
إنت بتقول : لعلك تكتب أمرا و في ذهنك أمر آخر ....
ده إنت حاله مستعصيه .... طيب أنا ها أكذب عليك ليه يا عم شومان ... هو إنت بعبع لا سمح الله عشان أخاف منك ... دا إنت حبيبي ... إنت بس روق دمك و هدي أعصابك و إقرا المقال تاني
أنا بادعو شباب الثورة كلهم يسيبوا الشوارع و يخلوا الديابه تموت بعضها ... أنا عاوز حقن دماء المصريين المخلصين ... أنا بادور علي السلام .... الجيش و الحكومه و الإخوان كله عك في بعضه .... شباب الثورة الطاهر النقي مش قدهم ... دمهم ها يروح هدر ...
إيه إللي مزعلك يا عم شومان في الرأي ده ... نفضي الشوارع من الشباب الطاهر و نسيب الوحوش لبعض
آديني شرحت لك رأيي علي ميه بيضه ... شرح مخصوص ليك ... إشرب شاي و تعال كلمني
صدقني ... علشان ما أزعلكش ها أكتبلك مقال مخصوص عن نشيد ألانشاد و سفر حزقيال و كوابيس يوحنا علشان تاخد راحتك فيه و تنزل حتتك بتتك في النصاري الكفار و تشبع تعليق زي ما إنت عايز بس صدقني حبوب منع الفهم اللي وصفهالك الشيخ الزغبي و الحويني و يعقوب و الشله إياها ها توديك في داهيه ... إعتمد علي نفسك و علي ربك

10 - شو مع المسواك يا شوشو
بشارة خليل قـ ( 2012 / 2 / 5 - 07:31 )
ما جبتش سيرته ليه؟
احنا مش لازم نتكلم وإلا نثير الفتن
اما البعبع الصلعمي معلش يتكلم ويكفر ويخون ويفتري ويستهزيء ويحرق ويهد ويقتل ويستبد!!! لأ هو المسواك من تحت عاملك مشكله من فوق ههههههههههههه ههه
روح ارضعلك خمس رضعات مشبعات من بول البعير (مُشبعات مش تلعب بديلك وأهي مصة وعالماشي!) بعدين تعال اتكلم

11 - استاذ اسعد
سلامة شومان ( 2012 / 2 / 5 - 23:21 )
مقالك انا قرأته كله ولم اعقب على باقى المقال لانه كلام خطير وكنت لااريد مزايدة فى اشعال فتنتك
فكلامك عن الجيش وقائدة كلام مستفز وعيب انك تتحدث هكذا على العسكر وقائدهم اللى كانو مصدر الامان فى ايام ثورة 25 يناير
ام انك نسيت الفزع والهلع وقتها وان الجيش كان هو اللى شايل كل حاجة
اما عن الاخوان فنحن منذ زمن بعيد ونحن نقرأ ونسمع من الحكومة
ومن العلمانيين ومن الاشتراكيين ومن الديمقراطيين كل ما يخضر ببالك ثم يتضح لنا ان الكل كاذب ويلفقون التهم للاخوان كعادتهم وكنا احيانا نصدق كلامهم
ثم يتبين لنا فى النهاية حقيقة ضربكم للاسلاميين سواء اخوان سواء سلفيين الخ
فنحن شعب مصر وابناء النيل لم يعد يؤثر فينا اتهاماتكم الباطلة والكاذبه لان اتضح ان الاخوان انظف واطهر اناس وكذلك السلفيين لانهم لم يسرقونا يوما ولم يتسببوا فى فى دمار البلد ابدا بل كانوا دائما فى السجون لاجل كلمة الحق فقط
والتاريخ ونحن نشهد على ذلك
فى 25 يناير كانوا افضل من نظم ودافع وحفظ البلاد هم الاخوان
وكنا نشعر منهم الالفة والترابط والخوف على البلد بحق
ولولا الله ثم الاخوان فى واقعة ما تسمونها الجمل لكانت الفاجعه الكبرى

12 - حبيبي يا عم شومان ... أيوه كده يا راجل إنطق
أسعد أسعد ( 2012 / 2 / 6 - 14:39 )
يعني جنابك إخوانجي ... عظمه علي عظمه ... و طبعا بتدافع عن الجيش و براءة الطفال في عينيك و كأن إللي وضع الإخوان في السجون هما الليبراليين أو المسيحيين و إللي عذب الإخوان و بهدلهم في المعتقلات كان الليبراليين الجيش لم ينزل إلي الشوارع يا أخ شومان إلا بعد أن كشف الإخوان و كشروا عن أنيابهم و خطفوا التحرير من الثوار ثم إن الجيش من يوم ما نزل و هو لم يحمي أحد بل دهس الكل بدباباته مسيحيين و مسلمين و وموقعة الجمل دبرتها الحكومه ضد الشعب و الإخوان المسلمين بالأكتر بتقول الحكومه سرقت البلد و ده صحيح لكن إيه رأيك في السعد و الريان و بنوك القرضاوي مش دول برضه إخوان مسلمين يا أخ شومان إنت بتجر ناعم مع الجيش لأنك عارف إنك مش قده و عاوز تعقد صفقه معاه تراهن إن الإخوان هايطلعوا الجيش زي الشعره من العجينه في مقابل إن الجيش يطلق أيديهم في البلد بس بعيد عن مصالح الجيش في مزارعه و مصانعه الخاصه اللي إنت بتقول إنك ما تعرفش عنها حاجه
المهم النقاش ممتاز بس أنا عاوزك تنطق هل فيه حاليا صراع ذئاب علي جثة مصر بين الجيش و الوطني و الإخوان و الا مافيش هي دي مقالتي و هي دي القضيه فيه صراع و الا مافيش
أحبك

13 - اتكلم بالاصول يا استاذ
سلامة شومان ( 2012 / 2 / 6 - 20:59 )
والله عيب عليك يا استاذ اسعد الكلام الفاضى اللى انت بتقوله
اولا انا لم اذكر انكم من سجن الاخوان -تعليقى واضح انكم دائما تتهمون الاخوان بما ليس فيهم والدليل انك قلت ان الريان والسعد اخوان وهم ليسوا من الاخوان
مع ان السعد والريان هم من انعشوا اقتصاد بلدنا ولكن الحكومة والبنك الدولى واليهود رفضوا المعاملات الاسلامية لانها ستقضى على البنوك الربوية -ياريت تكون فاهم اللعبة جيدا الا اذا كنت معاهم ومتفق على لعبهم
وانا قلت مرات ومرات اننى ليست من الاخوان ولا السلفيين ولكننى مسلم موحد بالله واحب الاخوان واحب السلفيين وكل جماعات الاسلام لانهم لايريدون الا الخير للبلاد والعباد ولكنكم لاتعلمون
وبعدين انت اليوم تتحدث عن الجيش والعسكر بكرة تقول الحقونا من البلطجية ووقتها تبحث عن الجيش
عارف النساء اللى راحوا عند مجلس الشعب كانوا بياطلبوا بايه بالقصاص
وانتم تتهمون حدود الاسلام بانها لاتصلح لهذا الزمان وتقولون انها حدود قاسية
فما هو رأيك فى مطالب الشعب الان بالقصاص من المجرمين ؟اليس هذا هو الاسلام وحدودة
القاتل يقتل -والزانى يرجم وشارب الخمر يجلد دا غير العذاب فى الاخرة
اليس هذا افضل من الخوف

14 - يا عم شومان يا حبيبي رجاء الرد علي تساؤلي
أسعد أسعد ( 2012 / 2 / 7 - 00:09 )
سؤآلي ما زال قائما و يحتاج إجابه أنا قلت

المهم النقاش ممتاز بس أنا عاوزك تنطق هل فيه حاليا صراع ذئاب علي جثة مصر بين-
الجيش و الوطني و الإخوان و الا مافيش هي دي مقالتي و هي دي القضيه فيه صراع و الا مافيش

ياحبيبي هوه ده صلب و هدف المقال أنا عاوز منك رد صريح هل هذه الذئاب الثلاثة تتصارع علي جثة مصر أم لا
أو بصيغه أخري هل يوجد صراع بين الوطني و الإخوان و الجيش
إنت بنفسك قلت إن الحكومه يعني الوطني هوه اللي وقع السعد و الريان و بنوك القرضاوي
طيب و إيه رأيك في الصراع الباقي (هل تقصد إن الريان و السعد و غيرهم من لصوص الإقتصاد المصري ليسوا إخوانا و ليسوا مسلمين و ده إللي قاله الشيخ حسن البنا عن جماعته من القتله و المجرمين و التاريخ يعيد نفسه
الشعب لا حول له و لا قوه لا يستطيع أن يصارع الحكومه و لا الجيش و لا الإخوان الشعب بينضرب و يموت من التلاته
فقط قبل اي شئ جاوب هل الجيش و الإخوان و الوطني في حالة صراع... نعم و الا لأ ؟ و بعدين ممكن نتفاهم في جميع النقط الباقيه
أحبك جدا جدا يا راجل يا عظيم

15 - يا عم شومان يا حبيبي رجاء الرد علي تساؤلي
أسعد أسعد ( 2012 / 2 / 7 - 00:09 )
سؤآلي ما زال قائما و يحتاج إجابه أنا قلت

المهم النقاش ممتاز بس أنا عاوزك تنطق هل فيه حاليا صراع ذئاب علي جثة مصر بين-
الجيش و الوطني و الإخوان و الا مافيش هي دي مقالتي و هي دي القضيه فيه صراع و الا مافيش

ياحبيبي هوه ده صلب و هدف المقال أنا عاوز منك رد صريح هل هذه الذئاب الثلاثة تتصارع علي جثة مصر أم لا
أو بصيغه أخري هل يوجد صراع بين الوطني و الإخوان و الجيش
إنت بنفسك قلت إن الحكومه يعني الوطني هوه اللي وقع السعد و الريان و بنوك القرضاوي
طيب و إيه رأيك في الصراع الباقي (هل تقصد إن الريان و السعد و غيرهم من لصوص الإقتصاد المصري ليسوا إخوانا و ليسوا مسلمين و ده إللي قاله الشيخ حسن البنا عن جماعته من القتله و المجرمين و التاريخ يعيد نفسه
الشعب لا حول له و لا قوه لا يستطيع أن يصارع الحكومه و لا الجيش و لا الإخوان الشعب بينضرب و يموت من التلاته
فقط قبل اي شئ جاوب هل الجيش و الإخوان و الوطني في حالة صراع... نعم و الا لأ ؟ و بعدين ممكن نتفاهم في جميع النقط الباقيه
أحبك جدا جدا يا راجل يا عظيم

16 - الذى يحدث -فلول تعوق الثورة
سلامة شومان ( 2012 / 2 / 7 - 11:39 )
انت تسميها صراعات
ونحن نسميها من الافضل لكى يكون قابضا على زمام البلد بالعدل والانصاف وشرع خالق الكون
والصراع لاجل التمسك بالحكم يحدث فى جميع الدول واعتقد ان الاخوان والسلفيين ما دخلوا هذا المنحنى الا لاجل عدم وجود العدل
ولكنك لم تذكر فى صراعك الليبراليين ولا الماركسيين ولا الاشتراكيين ولا الديمقراطيين ولا العلمانيين مع انهم اساس الصراع التى تتحدث عنه
ولو انك قرأت كتابا واحدا للامام حسن البنا رحمت الله عليه ما كنت لتقول عنه ما قلت

انا لاارى صراعا انا ارى فرق انقاذ لاجل البلد من ممن هم يحبون البلد وكل حسب فكره
ولاجل اننا جربنا كل ما سبق ذكرة ووجدنا السرقة والبطاله والرشوة والدمار لاقتصاد البلد -فنحن نريد الاسلام بتشريعاته الحقيقية تحكم البلاد وليس احكام البشر الضاله الخاوية الا من الانحراف والدعارة والانحلال الاخلاقى
واتمنى ان يعود الكثير مثل الريان والسعد مرة اخرى لاجل انتعاش الاقتصاد
ونحن رأينا رجال الاعمال الذين نهبوا البلد وعلى رأسهم ساويرس بل وسرقوا البنوك
هل نظل عاكفين عليهم ؟
فالذى يحدث اليوم هو بين فلول النظام والمخلصين لاجل انقاذ البلد وليس الاخوان والجيش

17 - صراع الإخوان مع الجيش مع الوطني
أسعد أسعد ( 2012 / 2 / 7 - 16:05 )
أخي الحبيب سلامه
السطر الأخير في كلامك يعني إنك تقول أنه ليس ثمة صراعات بين الجيش و الإخوان
يبقي يا إما أنا جاي من ورا الجاموسه أو يمكن أكون خواجه سايح ببرنيطه جاي من بلاد بره
الإخوان قتلوا عبد الناصر في المنشيه و هو أعدم سيد قطب
الإخوان عملوا حركة الفنية العسكريه و قتلوا الشيخ الذهبي
الإخوان قتلوا أنور السادات
الإخوان قتلوا السائحين في الأقصر و أعداد أخري في أماكن متفرقه
الإخوا وان حاولوا قتل مبارك في أثيوبيا
طبعا في نظرك زي حسن البنا ما قال ليسوا إخوانا و ليسوا مسلمين
إذا لم يكن هذا صراع بين الجيش و الإخوان فبماذا تسميه
أنت بعضمة لسانك عاوز الريان و السعد يرجعوا و دول نهبوا إقتصاد البلد و فلوس المسلمين
الإخوان صراعهم مع الجيش و الوطني مش عشان شرع الله لكن علشان هبره فلوس عباد الله
متتأخرش علي ... بجد أنا أحترم فيك مناقشاتك الحلوه
ربنا معاك

اخر الافلام

.. رفع علم حركة -حباد- اليهودية أثناء الهجوم على المعتصمين في ج

.. 101-Al-Baqarah




.. 93- Al-Baqarah


.. 94- Al-Baqarah




.. 95-Al-Baqarah