الحوار المتمدن - موبايل
الموقع الرئيسي


حوار مع الله – محاولة للفهم

نضال الربضي

2013 / 12 / 10
العلمانية، الدين السياسي ونقد الفكر الديني


حوار مع الله – محاولة للفهم

- صباح الخير يا رب
صباح الخير نضال، كيف صبحت اليوم؟


- تمام (مع ضحكة خفيفة)
ليش عم تضحك نضال؟


- يعني يا رب إنتا عارف كيف أنا صبحت، و بتسأل برضه.
مزبوط أنا بعرف، بس لما أسمعها منك بتفرق كتير


- شو بتفرق؟
بتفرق إنها بتطلع منك مثل ما بدك إنتا تحكيها، بتطلع من قلبك.


- بس يا رب أنا قلبي في مليون سؤال و انت بتعرفهم كلهم ليش ما بتسألني عنهم؟
إسأل براحتك، أنا هيك علمتك. و لا نسيت؟


- لا يا رب ما نسيت، بس إنتا بتصعب الأمور كتير، ما حدا شايفك، و لا حدا سمع صوتك، و الناس اللي قالو عن أنفسهم أنبيا و جابو كتب تعبونا معهم، لا هم فاهين شو هم بدهم، و لا إحنا فاهمين عليهم، و حكولنا أشياء طلعت بالآخر غلط،.

بس أنا يا نضال مش غلط، أنا معك جواتك و انتا بتعرفني منيح، و جربتني و اختبرتني، ليش محتار؟


- محتار يا رب لإنو الأنبيا قالو....
اتركك من الأنبياء و سواليفهم نضال، و اطلع بقلبك من جوا و قلي شو حاسس شو شايف بعقلك و بقلبك.


- انا حاسس و شايف إنك هون في قلبي و في الناس و في العالم، لكن الظلم و الشر كل يوم ببعتولي رسالة إنو اللي أنا شايفو مجرد أحاسيسي الداخلية، مش الواقع.
و الخير اللي في العالم شو ببعتلك رسالة؟


- ما ببعتلي رسالة.
مش غريب إنو الشر بقلك إني مش هون بس الخير ما بقلك إني هون؟ مش شايف تناقض؟


- مش مسألة تناقض يا رب، بس إنتا مش محسوس، ما بتعلن عن نفسك، دايما ً متخبي، ليش ما تبين نفسك؟
أبين نفسي يعني قصدك بلحم و دم؟ و لا بطاقة نورانية؟ و لا كيف بالزبط؟


- زي ما بدك.
ما بنفع زي ما بدي، لإنو لو بلحم و دم رح تقولو إنسان، و لو طاقة رح تقولو ظاهرة علمية مصدرها مجهول، و لو بطريقة ثاتية رح تبلشو تتفلسفو مثل دايما ً في المنطق و تنسو الموضوع الرئيسي.


- طيب كيف نعرف إنك موجود؟
اطلع حواليك، بتشوفني في الناس و في الطبيعة و بتعرف إني موجود لما صوتي يحكي معك، لما الأصوات اللي في داخلك تسكت، إمسك ريموت حياتك وخفض الصوت شوي بتسمعني.


- مهو يا رب إنتا عن جد بتصعب الأمور، هذا مسيحي و هذاك مسلم و الثالث يهودي، و الرابع بوذي و الخامس هندوسي، و السادس لا أدري، و السابع ربوبي و الثامن ملحد، و التاسع مش عارف إيش، و بعدين مع قائمتك الطويلة؟
أنا ما عندي قائمة، عندي كلمة واحدة صنعتها و سميتها "الإنسان" إنتو اللي عملتو القائمة الطويلة هاي، و هي لا تعنيني في شئ نهائيا ً.


- يعني ما في صح و ما في غلط؟
طبعا ً في: الصح هو الحب و المحبة، و الغلط هو الكراهية و الدمار، بس.


- طيب و الكتب السماوية و غير السماوية و السواليف هاي؟
إقرأها فيها كلام حلو بس شغل عقلك، كلشي عن المحبة صح، كلشي عن الكراهية غلط.


- طيب ليش ما إنتا تصلحها؟
يا نضال يا حبيبي برضاي عليك تفتح مخك شوي، أنا ما كتبتها أصلا ً، أنا ساعدت في كتابتها شوي، بس مش مسؤول عنها.


- و الناس اللي بتتبعها و بتبني حياتها على أساسها؟
الناس دايما ً رح تبني حياتها على إشي، الملحد ببني حياتو على نظامو اللي في الصح و الغلط، المتطرف ببني حياتو على نظامو اللي في الصح و الغلط، أنا ما بهمني أي نظلم تمشي عليه، بهمني شغلة وحدة بس: إنو تحبو بعض و تعيشو مع بعض.


- طيب مهو في كتب مكتوب فيها إسمك و بتحكي إنو لازم نذبح بعض.
صحيح و في كتب مش مكتوب فيها إسمي و بتحكي لازم تذبحو بعض و لا إنتا ناسي النازية و الشيوعية المادية و غيرها؟ شو رأيك نضال، كل ما واحد كتب إسمي بمحل أنط و اقول: ما دخلني، معقول هذا التصرف؟ الناس يا نضال بدها عذر عشان تذبح بعض، فسواء ً الكتب قالت إذبحو و لا ما قالت رح يضلو يذبحو.


- طيب و الناس؟
مالها الناس؟ أنا حطيت فيها زمان إشي إسمو مخ و فطرة و اللي بمشي عليها عمرو ما بذبح و لا بقتل و لا بظلم، إنتو إجيتو غيرتو كلشي، ذبحتو بعض و اضطهدتو بعض، و رفعتو بعض سادة و عبيد، الغلط عليكم مش علي.


- طيب إنتا شو بدك منا بالزبط هلا؟
ما بدي إشي، حبو بعض و كتر ألف خيركم، و أنا لما تحبو بعض بتسمعو صوتي منيح.


- بالمناسبة يا رب، شكرا ً.
LOL يا معلم نضال، شكرا ً على إيش بالزبط؟


- على كلشي يا رب، أنا بحبك.
بعرف و أنا كمان بحبك و بحبكم كلكم.


- طيب ليش ما تبين حالك؟ كيف هاي؟ حشرتك في خانة اليك، صح؟
نضال إنتا مش الآن قلت إنك بتحبني؟ تدلل و اسأل زي ما بدك، و الإجابات مع الوقت و مع الخبرة، بس طول بالك.


- حتى متى أطول بالي؟
طول ما إنتا بتحب، المدة ما إلها أي أهمية، لإنها بدون تأثير. فقط لما بتفقد الحب بتصير تنظر للوقت.


- مزبوط، أنا بعرف هذا الإشئ كويس.
فإذن حب الناس، و بتشوفني هون بقلبك و على الأرض، و لما يجي الوقت الذي جسدك بتنتهي دورته، رح تكون معي.


- كيف؟
بدون كيف، هاش شغلتي، و مثل ما إنتا بتعرف تحب و بتهتم باللي بتحبهم، أنا بعرف أحب و أهتم باللي بحبهم.


- حبيبي يا رب.
حبيبي نضال.


- تشرب قهوة معي؟
بشرب، خلي السكر وسط.





التعليق والتصويت على الموضوع في الموقع الرئيسي


التعليقات

1 - حوار مع عاجز
محمد بن عبدالله ( 2013 / 12 / 10 - 18:16 )
هذا حوار للأستاذ نضال مع عاجز غلبان ضعيف المنطق والمقدرة

انظر إلى أقوال هذا المسكين المحبط:
(((ما بنفع زي ما بدي، لإنو لو بلحم و دم رح تقولو إنسان، و لو طاقة رح تقولو ظاهرة علمية مصدرها مجهول، و لو بطريقة ثاتية رح تبلشو تتفلسفو مثل دايما ً في المنطق و تنسو الموضوع الرئيسي.)))

و(((شو رأيك نضال، كل ما واحد كتب إسمي بمحل أنط و اقول: ما دخلني، معقول هذا التصرف؟)))

(((ليش ما إنتا تصلحها؟
يا نضال يا حبيبي برضاي عليك تفتح مخك شوي، أنا ما كتبتها أصلا ً، أنا ساعدت في كتابتها شوي، بس مش مسؤول عنها.)))


مسكين عاجز هذا الكائن !

2 - جامد
الدالى ( 2013 / 12 / 10 - 18:38 )
حوار جامد يا نضال بس انت نسيت تسأله عن موقفه من satan

3 - إلى الأستاذ محمد بن عبد الله
نضال الربضي ( 2013 / 12 / 10 - 18:40 )
تحية طيبة أستاذ محمد،

في اقتباسك الأول: أردت أن أوضح دور الفعل الإنساني في الحكم على الأمور من معيار الإنسان الشخصي و الذي هو ليس بالضرورة معيار الحقيقة، فنحن في علومنا ما زلنا لم نكتشف 1 بالميار من الكون، فلا يمكننا أن نحكم حكم نهائي و نقول لا يوجد إله.

في اقتباسك الثاني: أردت أن أوضح دور الحرية الشخصية للإنسان و تعارضها مع فكرة تدخل الله في كل صغيةر و كبيرة حتى يصبح العالم عندها مثل مسرح العرائس التي تحركها خيوط الله و هذا لا ينفع.

بالمجمل الكون هو تجلي الله، و الله كائن واعي عاقل ذكي محب أعظم بدون قياس من أفكارنا و محدوديتنا، و هو لا يريد منا طقوس و عبادات و تناحر و اقتتال. ربما تسألني كيف تعرف ذلك؟ أجيبك: ببساطة أنا أنظر إلى الكون و أفهم كيف يعمل من حولي، و أنظر إلى إنسانيتي و أرى ماذا تطلب مني، فأنسجم معها و مع الكون في المحبة.

أحيانا ً أعظم الأمور أبسطُها.

أهلا ً بك دوما ً أستاذ محمد.

4 - إلى الأستاذ الدالي
نضال الربضي ( 2013 / 12 / 11 - 05:24 )
أهلا ً أستاذ دالي،

يسعدني أن الحوار لقبي قبولا ً لديك.

Satan لا مكان له في حوار بين أب ٍ و أبنائه، و على الرغم من إشكالية منطق وجوده لكن تحيد دروه ممكن و مطلوب في الإيمان العامل بالمحبة.

أحببت في مقالي أن أهتم بالرئيسي و تركت ما سواه، ربما يكون ذلك موضوع مقال آخر، أقول ربما.

أهلا بك دوما ً.

5 - لقد نسيت
نيسان سمو الهوزي ( 2013 / 12 / 11 - 06:02 )
لقد نسيت ان تسأله كيف يتعلم الجماعة الحب !!!!!!!

6 - إلى الأستاذ نيسان سمو الهوزي
نضال الربضي ( 2013 / 12 / 11 - 07:33 )
أهلا ً بك أستاذ نيسان،

إن مثالنا الطيب أمام الآخرين يُخرج فيهم الطيبة و الحب و يضعهم أمام أجمل ما فيهم و فينا جميعا ً و هذا دورنا و ليس دور الله.

الله فينا و هو المحبة و الحقيقة و علينا أن ننقله للناس.

أهلا ً بك دوما ً.

7 - جميل
بلبل عبد النهد ( 2013 / 12 / 11 - 08:46 )
جميل جدا الله يتنازل عن كبريائه ويحاور انسان

8 - إلى الأستاذ بلبل عبد النهد
نضال الربضي ( 2013 / 12 / 11 - 10:03 )
أهلا ً بك أستاذ بلبل،

في الحقيقة نحن الذين أعطينا الله صفات التعالي و التكبر و الجبروت و الانفصال. أما لو نظرت إلى الطبيعة لوجدت أن الله مُتواضع وديع مُتحد مع كل الكائنات حتى تلك التي نحن نظن أنها قذرة أو نجسة أو بلا قيمة (لاحظ الفعل البشري هنا أيضا ً و وضعنا للمقايس مرة أخرى) كائنات مثل الديدان و الصراصير و الحشرات و الطحالب، بينما الله واحد معها كما هو واحد معك أنت و معي أنا و مع كل شئ.

من يمش مع الله يتعلم الحب و التواضع صدقني.

دمت بود.

9 - رائع
سامي المحامي ( 2014 / 2 / 9 - 09:51 )
حوار رائع ولكن يقع ضمن مناجاة النفس انت رائع يا نضال وعجبني التبسيط بتناول هكذا موضوع

اخر الافلام

.. موجز أخبار الواحدة ظهرًا - رئيس الوزراء يهنئ الرئيس السيسي و

.. وادي الرافدين وتراثه القديم محاضرة استذكارية وحوارفي الذكرى




.. ليبيا.. هيي?ة الا?وقاف في طرابلس تثير ضجة واسعة بمهاجمتها ال

.. 158-An-Nisa




.. 160-An-Nisa