الحوار المتمدن - موبايل
الموقع الرئيسي


يوميات جاسم و فريدة

علاء ورد حسين

2014 / 12 / 6
المجتمع المدني


يبقى العشق في الحارة الشعبية .....مباح في زمن الممنوع ..... ولو من طرف واحد....
جاسم فطير . و فاهي..وهتلي وسرسري .....وابو نسوان ... ويشرب عركَ فوك السطح .هذا التعريف الرسمي لجاسم من كل ابناء المنطقة .و هذي صفاته اللي لا يختلف عليها احد......... عيون جاسم ابو العركَ رصدت فريدة.......فريدة ....اربعينية ..و مدللة ..و بنت عائلة طيبة من خارج المنطقة.. لكن المشكلة ما عدها حظ بالزواج ...الاول استشهد بالصقوط.... والثاني استشهد بمفخخة .. بقت في البيت تربي طفلها الوحيد .....حالتها تعكس مشكلة نساء الوطن في هذا الزمن الصعب .... كان الناس بالمنطقة تعطف عليها بحكم كونها عايشة فقط على تقاعد زوجها ...... جاسم خله باله على فريدة .و اتدوهن بيها... انبهر ببياض بشرتها .... وحمرة خدودها.... وسواد عيونها...مرة من المرات فريدة شكرت جاسم ابو العركَ لان عــبّر ابنها الشارع .....جاسم ما نام بذيج الليلة ...... وظل سهران مع اغنية طيب الذكر سعدي الحلي (جيران نزلوا بالطرف يا يمه احبهم ) ..سكـّــر جاسم وطوخ .... و قرر يطفر على فريدة بنص الليل .... فكر انه بس يطفر التيغة ...راح يلاقي فريدة بالاحضان. والموضوع يمر سكتاوي.. واحلوت الشغلة بعينه ... كان بينهم وبين بيت فريدة بيتين ....بيت حجي زكي اللي ينامون من المغرب .... و بيت صباح ابو الصمون .... و هم ينام من وكت لان عنده فرن الغبشة .....جاسم اتشلبه على اول تيـغة وعبرها رغم انه كان راسه يفتر لان المشروب وصل لراسه .... صار على سطح بيت حجي زكي ..... ظل بس سطح بيت صباح ..اذا طفر ...يوصل لفريدة ....صعد على الحايط و نزّل رجليه على الجهة الثانية .مصييييييبة .......طلع ماكوا سطح جواه!!!!!!! رجليه ظلت ملولحه ......حاول يرجع لسطح حجي زكي...لكن تعبت ايده ....فلتت الطابوكَة اللي كان مجلب بيها ....وووووووووب ................. و نزل نجخ مباشرة على العجين مال صباح ابو الصمون





التعليق والتصويت على الموضوع في الموقع الرئيسي


اخر الافلام

.. ما حدود تغير موقف الدول المانحة بعد تقرير حول الأونروا ؟ •


.. نتنياهو: أحكام المحكمة الجنائية الدولية لن تؤثر على تصرفات إ



.. الأمين العام للأمم المتحدة للعربية: عملية رفح سيكون لها تداع

.. الأمين العام للأمم المتحدة للعربية: أميركا عليها أن تقول لإس



.. الشارع الدبلوماسي | مقابلة خاصة مع الأمين العام للأمم المتحد