الحوار المتمدن - موبايل
الموقع الرئيسي


التاريخ المجهول 3 ( وهم الفتنة )

صلاح شهاب
باحث
(Salah Shehab)

2014 / 12 / 14
دراسات وابحاث في التاريخ والتراث واللغات


ضروري جدا علشان نفهم الفتنة اللي حصلت بعد مقتل الخليفة الثالث عثمان بن عفان , اننا لازم نستبعد الاحداث المشكوك فيها , بعد كدا نبسط الباقي منها على أد ما نقدر , أنا بقول الكلام ده لأني النهارده سمعت شيخ تابع للأوقاف بيتكلم عن الفتنة والخوارج وبيغلط غلطات قاتلة في احداث المفروض يكون هو اول واحد ملم بيها و لكن للأسف شغل كله حفظ بدون وعي .
أولا : العالم الاسلامي قبل مقتل عثمان كان عبارة عن كتلة واحدة , الكتلة ديه انقسمت نصين نتيجة لسياسات واجراءات غلط حصلت للأسف في أواخر عهد عثمان , فانقسم العالم الإسلامي لكتلتين كبار بيضم كل منهم اطياف صغيرة مختلفة , الكتلتين الكبار دول هما معسكر الثوار الرافضين والناقمين على السياسات العامة للخليفة واعوانه , وده الجزء اللي كان بيحاول يعمل حركة استباقية علشان يغير مجرى التاريخ اللي بيعيش فيه , والمعسكر التاني كان معسكر الدولة وده المعسكر اللي كان بيحاول يحافظ على هيبة المجتمع والاستقرار وحط تحت كلمة الاستقرار خط لأننا هنرجعلها تاني ونعيد من الأول .
ثانيا : العالم الاسلامي بعد مقتل عثمان وتولي علي زمام الأمور في الدولة انقسم بردوا لجزءين كبار , اتحركت فيها الاهواء زي قطع الالعاب من وإلى , يعني الثوار اصبحوا في جزء اللي بيأييد للخليفة الجديد وبيطالب بالاستقرار وحط تحتها بردوا خط , الجزء التاني وهو اللي كان بيضم اعوان عثمان وكان قبل كدا بيطالب بالاستقرار , بقى شايل هم الثورة وبيطالب بدم عثمان .
كل ده وماكنش فيه حاجة اسمها شيعة ولا خوارج , يعني م الاخر الفترة الاولى من الفتنة كانت عبارة عن معسكرين ناس مع وناس ضد و لغاية معركة صفين سنة 37 ھ , كان الخلاف على دم عثمان , وهل الثأر قبل أو بعد الاستقرار , المعركة اللي حصلت في صفين كانت الغلبة فيها رايحة لناحية اصحاب علي , راح اصحاب معاوية رفعوا المصاحب على اسنة الرماح , المصادر بتقول ان في الاساس عمرو بن العاص هو اللي اشار عليهم بكدا .
وقفت مجموعة من جيش علي تطالب بوقف المعارك وتحكيم كتاب الله , الخليفة علي كان رافض لأن المعركة كانت في الأساس محسومة , لكنهم اجبروه على قبول التحكيم , ورغم أن اللي حصل في التحكيم من امور غير مثبتة إلا ان اللي يهمنا أن من بعد التحكيم انقسم العالم الإسلامي لتلات فرق مش معسكرين .
فرقة مع معاوية وديه اللي بعد كدا هتدير الدفة وتحول الموضوع لموضوع ملك ووراثة مش دم وخلافه , وفرقة كانت مع الخليفة علي وسموا نفسهم شيعة علي , وفرقه خرجت عن جيش علي لما وافق باللي حصل في التحكيم وسموهم الناس بالخوارج , ومش هما اللي رفعوا المصاحف لأن في تليبس في الموضوع ده بالذات , هما كان شعارهم إن الحكم إلا لله , ورأيهم إن علي أساء في القبول بقرارات اللي اتخدت في التحكيم .
المطالبة بالاستقرار انتقل من معسكر علي لمعسكر معاوية , بعد ما أمور الدولة طبعا بقت في ايديهم , الشيعة بدأوا يطالبوا بأحقية أبناء علي في الحكم , والخوارج كان همهم الأول أن السيرة ترجع لمجراها الاولاني ويبقى اساس البيعة والاختيار للحكم هو شرع الله وكتابه , بنلاحظ هنا ان التلت مجموعات نسيوا او تناسوا الموضوع الأولاني اللي انقسموا في الاساس علشانه وهو دم عثمان وبقى الموضوع مقتصر على ملك , وأحقيه , وأسبقية , واستقرار, وحاجات مالهاش اي لزوم أو مبرر .





التعليق والتصويت على الموضوع في الموقع الرئيسي


اخر الافلام

.. باريس تسلم -بري- الورقة الفرنسية المتعلقة بوقف إطلاق النار ب

.. ترامب يواصل تصدر استطلاعات الرأي في مواجهة بايدن| #أميركا_ال



.. الخارجية الأميركية: 5 وحدات في الجيش الإسرائيلي ارتكبت انتها

.. تراكم جثامين الشهداء في ساحة مستشفى أبو يوسف النجار برفح جنو



.. بلينكن: في غياب خطة لعدم إلحاق الأذى بالمدنيين لا يمكننا دعم