الحوار المتمدن - موبايل
الموقع الرئيسي


صناعة الإرهاب وتفريخ الإرهابيين في السعودية 1

شتيوي بوخبله

2015 / 11 / 17
العلمانية، الدين السياسي ونقد الفكر الديني


قلت لكم أمس وش الفرق بين الإسلام العادي اللي ورثناه عن آبائنا وأمهاتنا ؛
والإسلام السعودي الدموي والإرهابي والمعادي لكل ملة ودين وعقيدة وطائفة مهي من إسلام أسسه الشيخ محمد بن عبدالوهاب وتبناه وتستر ومشى عليه ابن سعود ؛ وبنى عليه شرعيته وكان لين اليوم أداة لشرعنة إجرامه وأكيد بواسطة وعاظ بلاده ومشايخ سلطته ؛
بس لازم نفهم ونعرف شي مهم كثير من الناس موب مصدقينه وهو أن كبار المشايخ سواء في نجد أو القصيم لهم نفوذ كبير وأن ابن سعود مسوي لهم ألف حساب ؛
وعلشان كذا منعم عليهم بالعطايا الجزرله بين فترة وثانية من فلوس بالملايين وأراضي ومزارع وسيارات فارهة والأهم أن واسطتهم عنده ما ترد ؛
وكبار المشايخ كل سنة لهم أعداد معروفة من الطلاب يقبلهم ابن سعود في الكليات الأمنية ومن ورا خشم أبوه ؛
يعني مثل الشيخ اللحيدان الملياردير المعروف واللي كان لسنين طويلة رئيس مجلس القضاء الأعلى وعضو هيئة كبار العلماء ؛ ها الشيخ له كل سنة 50 مقعد دراسي في كلية الهالك فهد الأمنية يختار من جماعته وربعه القصمان ويتوسط لهم للالتحاق بالكلية الأمنية ؛ وبعدها يتم تعينهم بعد تخرجهم برتبة ملازم في المباحث العامة أو في الاستخبارات العامة ؛
والوكاد أن كثير من المشايخ مثل اللحيدان ؛
وزبدة الكلام أنه موب صحيح أن ابن سعود مسيطر على كبار المشايخ لا ؛ بس هو قدر يحتويهم بالإغراءات والمناصب ولا يقدر يزعل كبار المشايخ ؛
بس بالمداراة والخداع يقنعهم باللي يبي ويمشيه باسم الدين ؛
ومع البقية من اللي أصغر منهم ماشي معهم بسياسة الجزرة والعصى زي ما يقولون ؛
لكن بعد لازم ننتبه أن المفتي مع ابن سعود علاقته وأنتم بكرامة زي علاقة الخربان مع الخربانة وأنتم عارفين مقصدي ؛
ليش ؟
لأن المفتي واللي هو بنفس الوقت رئيس هيئة كبار العلماء من آل الشيخ ؛
وأما أغلب كبار المشايخ اللي احتواهم ابن سعود هم من القصيم ؛ وفيه حساسيات مناطقيه بين القصمان ومشايخ نجد ؛
وطويل الذيل ابن سعود عرف شلون يلعب صح بها الوتر ويعزف عليه مزبوط ؛
والوكاد بعد أني ما بديت هرجي بذي إلا علشان أمهد لدور المشايخ بعلم ورضا وتمويل ابن سعود في صناعة الإرهاب وتفريخ الإرهابيين من قاعدة وداعش وغيرهم ؛
أي نعم معمل التفريخ والتفقيس بمملكة ابن سعود ؛
وأكبر دليل أن ابن سعود مع كثرة الإرهابيين اللي يقول إنه مسكهم وسجنهم ما قد طبق عليهم حد الحرابة والقتل إلا مرة واحدة ؛ لأن بعضهم من القاعدة وبأمر مباشر من ابن لادن قلبوا على ابن سعود وهذولا عددهم أربعة وقصهم في الرياض بآخر عهد الهالك المقبور فهد ؛
يعني لو ما انقلبوا عليه كان ما أعدمهم وقطع أرقابهم ؛
والحين فيه في سجون المباحث بالرياض والقصيم والمدينة إرهابيين كثير وجرايمهم حسب شريعة ابن سعود تلزم قص رقابهم بسيفه الأجرب المصدي بس ما سواها ؛
تدرون ليش ؟
بعدين أعلمكم ؛
لا وبعد مسوي لهم برامج مناصحة وترفيه ويتفاخر بالصحف أنه يزوجهم على حسابه في سجونه وممشي رواتب لأهلهم وممشي أمورهم زين ؛
تدرون ليش ؟
بعدين تعرفون لأني أبكتب سلسله عن الموضوع وتبون تعرفون كل شي ؛
زين وش هو إسلام آبائنا وأجدادنا العادي ؟
هذا سلمكم الله إسلام الأعرابي اللي قال للرسول يامحمد شف أنا أبصلي الخمس وأبي أزكي زكاة مالي وأبي أصوم وأبي أحج وما ني زايد عليها وش رأيك يا محمد ؟ أدخل الجنة ؟ قال له الرسول نعم ؛ وبعد ما راح قال الرسول لأصحابه أفلح إن صدق ؛
هذا هو إسلامهم المعتدل العادي اللي ما فيه حشو بالدماغ من الصغر عن الولاء والبراء والكره والحب في الله ؛ إسلام خالي من التحريض على قتل المخالف لإسلام ابن سعود ؛
زين والحين نمهد بكلام بسيط لسلسلة مقالات تفضح شلون ابن سعود يصنع الإرهاب ويفرخ ويفقس الإرهابيين ؛
والوكاد بعد أن وسايله كثيره وأدواته أكثر ؛
بالمدرسة والمسجد والجامع ؛ ومكاتب الدعوة والإرشاد بالداخل في مملكته ؛
وفي الخارج بتأسيس آلاف المراكز الإسلامية حسب الإسلام السعودي ؛
تصدقون يا جماعة الخير حتى هنا عندنا بأمريكا وبالضواحي بعد مراكز منها ؟؟؟ يعنى قرى زي ما نقول أما في الولايات والمدن الكبيرة فخذ راحتك بأعدادها ؛
المهم بالجزء الثاني بكره نبدأ بالوسيلة الأولى لصناعة الإرهاب في السعودية حسب عقيدة ومنهج الإسلام السعودي وشلون يفرخون ويفقسون الإرهابيين داخليا وخارجيا .





التعليق والتصويت على الموضوع في الموقع الرئيسي


اخر الافلام

.. المحكمة العليا الإسرائيلية تبدأ النظر في تجنيد -اليهود المتش

.. الشرطة الإسرائيلية تعتدي على اليهود الحريديم بعد خروجهم في ت



.. 86-Ali-Imran


.. 87-Ali-Imran




.. 93-Ali-Imran