الحوار المتمدن
- موبايل
الموقع
الرئيسي
ملاحظات حارقة في موضوع الحرقة
محمد محسن عامر
2017 / 10 / 6المجتمع المدني
للملاحظ البسيط يظهر الارتفاع الملحوظ في عدد الهجرات الغير شرعية الي نضاف ليها التوثيق و النشر على صفحات الفايسبوك في الوقت الي كانت تصير في كنف السرية الكاملة و الإعداد المحكم . فيديو حرقة يقال أنها لأبناء سيدي بوزيد في زورق خشبي يشق عباب البحر في عز النهار و كأن المسألة نزهة في حوض سباحة وسط الغناء و التصفيق مع تعامل إعلامي مكثف معاها ڨاعد يعمل في حاجة خطيرة ياسر ياسر لشبابنا .ڨاعد يڨول راهي البحر مفتوح لبلاد الطليان مالة آنافا شڨوا عباب البحر لبلاد اللاكامورا و الغبرة و الفلوس الي كيف التراب .الصورة هاذي خطيرة علخر و ڨاعدة تڨول إنه فما تمشي خطير ڨاعد يدفع في شبابنا للموت في البحورات في واقع مأساوي في دواخل البلاد و أحزمة الفقر العملاقة المحيطة في المدن . و الأهم الموانئ البحرية الي غايب فيها الأمن باش ما نڨولوش متورط .
الحرقة راهي مش نڨز في فلوكة و طير . ثما شبكات مافيا و عصابات تخدم في التسفير غير الشرعي .كيفاه يصير هذا .. إسمع آ سيدي ديما فما شخص مهمتو لمان الحرقة لصالح بارون خفي هو الي ينظمها و يتسمى في داخل البلاد خيط حرقة . يتلم الشباب فاقد الأمل الي لام زوز و الا ثلاثة ملاين من السرقة او العمل أو واخذها من دارهم تحت الضغط . تتلم المجموعة الحارقة في بيت يتسمى "ڨونة" و هو عبارة على بيت يبقوا فيه الحارقين أيام طويلة للتمويه حتى استكمال الإستعداد .الحرقة عادة تكون ليلا و يتم اختيار الطقس الخايب باش "السكادرة" متاع الحرس ما اطيحهمش و تبدى الحرقة ..فما فيديو معروف برشا لباخرة كبيرة جزائرية في طريڨها نحو مرسيليا تلڨى شباب مطيش في ڨلب البحر المتوسط ..مجرد التفكير في المسألة يقشعر البدن و من حسن حظهم تم انقاذهم ..في الوقت الي الراطبة التونسية للدفاع عن حقوق الإنسان و برشا جمعيات عندها ملفات مئات إلي تفقدوا في البحر و ما سمع بيهم حد ..
أغلب الحرقات الي يتكتبلها النجاة يتلقفها حرس الحدود الإيطالي و يتحطو في معتقل لامبادوزا (نعرش تتفكرو حادثة حرق المعتقل و المهاجرين إلي ماتو إلي فيهم توانسا) حتى يعطوهم سيجور بثلاث أشهر و يطيشوهم في الشوارع للجوع و إلا لعصبات المافيا إلي تستعملهم "عصافر غبرة" ..
فما حاجة مش مفهومة ..فما دعاية مبطنة للحرقة مش معلوم شكون يغذي فيها و شكون يحرك في خيوطها ..كيما كانت قبل الحرقات المفضلة في بداية الألفية على ليييا الي ينظموا فيها كبار مسؤولين في نظام العقيد القذافي بعد ما تسربست في تونس مدة و على تركية فاليونان في فترة ..رجعت و انتعشت توا ..شبابنا ڨاعدين يتاجروا بآلامهم سيستام أجهض أحلامنا و من فما يرموهم لآباطرة التهريب إلي ياخذوا على الراس أكثر من ثلاثة ملاين للمجهول في البحر إما الغرق وحيدا في مياه المتوسط أو تحت ڨناطر روما و إلا في إيدين المافيا ..تونس مش بخير ..
|
التعليق والتصويت على الموضوع في الموقع الرئيسي
.. شهادة محرر بعد تعرضه للتعذيب خلال 60 يوم في سجون الاحتلال
.. تنامي الغضب من وجود اللاجئين السوريين في لبنان | الأخبار
.. بقيمة مليار يورو... «الأوروبي» يعتزم إبرام اتفاق مع لبنان لم
.. توطين اللاجئين السوريين في لبنان .. المال الأوروبي يتدفق | #
.. الحكومة البريطانية تلاحق طالبي اللجوء لترحيلهم إلى رواندا