الحوار المتمدن - موبايل
الموقع الرئيسي


محاضرة جيل دولوز، 17 مارس 1987: شنوّة معناها ابداع؟ (جزء 2)

ضياء البوسالمي

2018 / 3 / 5
الفلسفة ,علم النفس , وعلم الاجتماع


شنوّة معناها يكون واحد عندو فكرة في حاجة معيّنة؟
نعاود نبدأ نحكي من كوني أنا نتفلسف وأنتم تعملو في السينما. هذا علاش ساهل برشا كان نقولو: الناس الكل تعرف انو الفلسفة مستعدّة تفكّر في أي حاجة. علاش مالا متخمّمش في السينما؟ أما هذي فكرة تافهة، الفلسفة ماهيش مجعولة باش تخمّم في الي يجي. ماهيش مجعولة باش تخمّم في حاجة أخرى. الي نحب نقولو الي وقت نتعاملو مع الفلسفة على أساس أنها قوّة "تُخْمَامْ فِي"، نسخايلو أنو نعطيوها قيمة كبيرة أما نحنا في الحقيقة نفرغوها من المعنى تاعها.
خاطر مفمّة حد مستحق للفلسفة باش يخمّم. معناها الناس الوحيدين الي قادرين بالرسمي يخمّمو في السينما هوما المخرجين ولا النقاد ولا الي يحبو السينما ومغرومين. وماهمش محتاجين جملة للفلسفة باش يخممو في السينما.
الفكرة الي تقول انو الي يفهمو في المات والمختصين فيه مستحقين للفلسفة باش يفكرو في المات هي لحقيقة فكرة تضحّك. اذا كان الفلسفة لازمها تخمّم في حاجة راهي معندهاش حتى سبب باش تتوجِدْ أصلا. كان الفلسفة موجودة هو خاطرها عندها المحتوى متاعها الخاص بيها.
كان نسألو رواحنا: شنوّة محتوى الفلسفة؟ هو بسيط. أنو الفلسفة حاجة تَخْلَقْ، تُنْتِجْ مفاهيم. وهالمفاهيم هذي ماهيش موجودة حاضرة. وماهيش موجودة في السماء تستنى في الفيلسوف باش يلمها. المفاهيم لازم تتصنع.
بالطبيعة لحكاية ماهيش مسيّبة، المفاهيم متتصنعش هكّة م الحيط منقولوش نهار هكّة: "اه، أيا برى نعملو مفهوم، باش تصتعو مفهوم." كيما بالضبط رسام مينجّمش يقول: "اه، أيا برى نعمل تابلو هكّة." لازم تكون فمّة حاجة. وكيما في الفلسفة كيما لبرّة م الفاسفة، مخرج سينما ميقولش: "أيا برى باش نعمل فيلم." لازم تكون فمّة حاجة للفيلم هذاكة. ماكانش مفمّة شي.
يبقى الي الحاجة هذي معقدة برشا، كان موجودة وهي الي تخلي الفيلسوف، وأنا نعرف فاش لازمو يتلهى، ميهتمش يخمّم في السينما. يحط روحو في بلاصة تخلّيه يقترح حاجات جدد معناها يصنع مفاهيم. نقول الي انا نتفلسف، معناها نحاول نخلق مفاهيم، نحاول نخمّمفي حاجة أخرى. كان نقول أنتم، الي تخدمو في السينما، شنوّة تعملو بالضبط؟ ناخذ تعريف بسيط وسامحوني خاطر فمّة برشا أخرين خير منو. نقول الي انتوما تخلقو أما موش في المفاهيم، خاطر ماهيش مهمتكم، الي تخلقو فيه نجمو نسميوه بلوك تع حركة في الوقت.





التعليق والتصويت على الموضوع في الموقع الرئيسي


اخر الافلام

.. تشاد: انتخابات رئاسية في البلاد بعد ثلاث سنوات من استيلاء ال

.. تسجيل صوتي مسرّب قد يورط ترامب في قضية -شراء الصمت- | #سوشال



.. غارة إسرائيلية على رفح جنوبي غزة


.. 4 شهداء بينهم طفلان في قصف إسرائيلي لمنز عائلة أبو لبدة في ح



.. عاجل| الجيش الإسرائيلي يدعو سكان رفح إلى الإخلاء الفوري إلى