الحوار المتمدن - موبايل
الموقع الرئيسي


شمسين ومطر - الى الشهيد الشيوعي علي سيد ابراهيم

كامل الركابي
(Kamel Alrikaby)

2006 / 3 / 29
الشهداء والمضحين من اجل التحرر والاشتراكية


(المجد للباسل والجسور, للأنف الأشّم والمقدام,والعار والمذلّة لمن يمد للصغار ظله)

يسهر ابروحي خيالك
ﮔمره واستاحش افراﮔك
روحي بفراﮔك تموت
ياعلي
وليلة عذابك ﭽنت احسها
نهر من نار
وعلى اضلوعي يفوت
يل شفت بيك الفرات العافيه
وجرحك اغاني
وملح دشتك للبيوت
ينبع الجمار من ﮔلبك طلع
وتغسل الوردات بانهارك عرسها
وبعذوبه اتفيض احلامك شموس
ياعلي
وهاكثر تاذي الغيبه عنكم ؟
ظلمه
وبوحشة عروس
منكسر بيها حلمها
وضي طفولتها وغنجها
وفي صدرها اللسه مامليان بوس
تنطفي اﻠﻤﻠﮔه الشمع
ليله بيها السكته تشرب كل دمع
ليله شفتك بالحلم جرحك يصيح:
انت يادم لوتطيح
مايطيح النجم من راسي
ولاتكسرني ريح
شجره وبماي الضمير
روحي تربى اعله الصحيح
ياعلي
وخلها تنام اعله القهر
وادم الماتستحي
ولاعدها احلام وسفر
ولاهي ﭽن شربت
عذب ماي النهر
وانت تدري
الروجه ياما ع الجرف
ذبت زبل
تصفى
ويظل اﺒﮔلبها
الدمه بالممشه عدل
ياعلي
وكل بيت
كل شارع حزين
يعرف اﺸﮔد روحي مليانه حنين
للسهر واللمَّه
وسوالف عمرنه الماتشح عنها السنين
اشما تفارﮔنه ,الشمس تنطي ضواها
الروحك وروحي
ضواها
الروح كل الطيبين
ياعلي
وخلها تروح
وادم المابيها روح
الماتعرف السيف
وتحس الجروح
ماتعرف العافيه
ولافاجت ابطوفان نوح
ياعلي
وكل نسمه تتباهى ابهواك
وبيت روحك
ﮔمره تتحنى ابضواك
يعلى مد الموجه وانت
النهر لو مد ماعلاك
تنزل وي المطر
شمسين وصحو
وتصعد وي الصوت
شمسين ابغناك
عذب
ياﮔلب اليحبّك
ينسى دمه ومانساك
ياعلي
وخل الدغش بالنور يصفى
اليوﮔﻊ بأول محطه
واللي ع الذل
راسه يغفه
يزغر اسمه بكل قطار
وبالسفر محد يعرفه
وع الرصيف ايظل بعيد
وحتى ضويات الرصيف
ابعينه تطفه !
وانت بجروحك تصيح:
إنت يادم لوتطيح
مايطيح النجم من راسي
ولاتكسرني ريح
ياعلي
وداعة(مجيد)
وفي عشرته
وروح كل طيِّب
على الموت ابشهامه
ماشفت دار احلى من دارك ,ﭽذب
وماشفت طيب احلى من طيبك ولا ...
رفت ابروحي حمامه
الغير ضيكم
يلي ضيكم
مشتعل بالروح نجمات وعلامه
وشتريد اعيوني غير ..
اتشوفكم بالخير وبفرحه وسلامه !
ياعلي
وغربة ايامي
وحسرة الوَّدع ضفافه
بغير موعد
طيفك ايمرني نهر
شايل سفينه وبيها مبعد
ﮔتله :
وشطول المسافه ؟
ياعذب
هايمته وترد؟
راح ....
لاخله محبه
ولاحنين ابروحي يركد
ياعلي
ولليوم
اتناك ابعطش
لليوم
اتناك ابعذاب
ﻨﺸﺒﭻ الخطوات ونفرفح سوه
للشجر للنهر لبيوت الاحباب
للسهر واللمَه وسوالف عمرنه
الماتشح عنها السنين
إنشد
إنشد
إنشد بكل بيت
كل شارع حزين
يعرف
اﺸﮔد روحي
مجروحه ابحنين !





التعليق والتصويت على الموضوع في الموقع الرئيسي


اخر الافلام

.. مواجهات بين الشرطة ومتظاهرين في باريس خلال عيد العمال.. وفلس

.. على خلفية احتجاجات داعمة لفلسطين.. مواجهات بين الشرطة وطلاب




.. الاحتجاجات ضد -القانون الروسي-.. بوريل ينتقد عنف الشرطة ضد ا

.. قصة مبنى هاميلتون التاريخي الذي سيطر عليه الطلبة المحتجون في



.. الشرطة تمنع متظاهرين من الوصول إلى تقسيم في تركيا.. ما القصة