الحوار المتمدن - موبايل
الموقع الرئيسي


الميراث القبطي الحائر

أيمن غالي

2021 / 12 / 22
دراسات وابحاث في التاريخ والتراث واللغات


سؤال مهم يطرح نفسه علينا بقوة ..
من هو الوريث الشرعى للحضارة والثقافة القبطية ؟ وميراث حائر يبحث عن وريث ..

ممكن تكون معلومة جديدة عليكم؛ إن القانون المصرى للأحوال الشخصية طبقا للشريعة الإسلامية تمنع إرث مختلفى الديانة؛ يعنى لو شخص غيّر ديانته؛ فلا حق له فى ميراث والديه مهما كانت ديانة الوالدين أو الإبن؛ يعنى ما ينفعش إبن مسيحى يغير ديانته للإسلام ويرث أبوه المسيحى، ولا إن أبن مسلم يغير ديانته للمسيحية ويرث أبوه المسلم .. الشريعة كده

طيب نشوف بقى الورث إياه إللى مش لاقيين له وريث ..
العصر القبطى والحضارة والثقافة القبطية؛ بدأت من منتصف القرن الثالث ق.م؛ يعنى وقتها ما كانش فيه مسيحية علشان ننسب الحضارة دى للمسيحية ولا للمسيحيين .. ولا فيش فى الدنيا كلها حضارة تم إنسابها لديانة ( الديانات مالهاش علاقة بالحضارات )
يبقى كده الحضارة القبطية بكل مفرداتها من لغة و فنون وعمارة وصناعة وعادات وتقاليد وغيرها من المظاهر هى ميراث للأقباط , ومالهوش علاقة بديانة ..

طيب ييجى لنا سؤال تانى؛ ومين الأقباط دول ؟
الأقباط هم سكان مصر وده الإسم إللى أطلقه العرب على مصر تخفيفا للإسم اليونانى لمصر إيجيبتوس وإللى مأخوذ من الأصل المصرى حوت كا بتاح

ييجى لنا سؤال كمان ..
يعنى مصطلح قبط ده مصطلح دينى راجع لديانة معينة ولا لقومية معينة ؟
طبعا التعبير المقصود بيه قومية معينة إللى هم سكان مصر وادى النيل .. يعنى لما نلاقى مصرى نقول عليه قبطى, ولو المصرى ده كان معتنق الديانة المصرية القديمة فهو قبطى، ولو غير ديانته للمسيحية فهو برضه قبطى، ولو غيرها للإسلام فهو برضه قبطى، ولو حتى غيرها للبهائية أو ترك الأديان أو ألحد فهو برضه قبطى .. لأن الديانة دى مش جنسية

يعنى دلوقتى الشيلة التقيلة والكنز إياه بتاع الحضارة القبطية دى بتاعة مين دلوقتى ؟
طبعا بتاعة كل مصرى مهما إختلفت ديانته ولا تقع تحت حكم شريعة وراثة الإبن لأبوه مختلفى الديانة ..

طيب السؤال الأخير ..
يعنى ممكن نقول إن الأقباط المسيحيين سرقوا الحضارة المصرية فى الحقبة القبطية من الأقباط المسلمين، ونسبوها لنفسهم ؟
هنا بقى أقدر أقول إن الغلط على الأقباط المسلمين إللى فرطوا فى ميراث أجدادهم، وإن كان كثيرين منهم النهاردة فهموا إن ده ميراث أجدادهم، وإن لهم حق فيها

الإبن من غير ثروة أبوه حا يحتاج سنين طويلة علشان يبدأ من الصفر، ويكوّن ثروة، وإن إعتمد على ثروة أبوه حا يقدر يضاعفها، ويبقى من أغنى الأغنياء ..
ثروة أجدادنا تبحث عن وارثيها الشرعيين مهما إختلفت أديانهم ومعتقداتهم ..





التعليق والتصويت على الموضوع في الموقع الرئيسي


اخر الافلام

.. شبح -الحي الميت- السنوار يخيم على قراءة الإعلام الإسرائيلي ل

.. الحركة الطلابية في الجامعات : هل توجد أطراف توظف الاحتجاجات




.. جنود ماكرون أو طائرات ال F16 .. من يصل أولاً إلى أوكرانيا؟؟


.. القناة 12الإسرائيلية: إسرائيل استخدمت قطر لتعمّق الانقسام ال



.. التنين الصيني يفرد جناحيه بوجه أميركا.. وأوروبا تائهة! | #ال