الحوار المتمدن - موبايل
الموقع الرئيسي


الفصحي مش لغتنا

محمد أبو قمر

2024 / 7 / 3
دراسات وابحاث في التاريخ والتراث واللغات


إحنا بنتعلم اللغة العربية الفصحي وبندرس قواعدها في المدارس زي ما بنتعلم اللغات الأجنبية ، يعني كأنها لغة أجنبية ، وفي الحقيقة إحنا لما بنفكر في أي حاجه بنفكر بلغتنا العامية ، وبنتبادل التهاني بها ، وبنقبل بها التعازي ، وحتي لما نتختلف مع بعض بنختلف بلغتنا العامية وبنتخانق مع بعض بها ، وبنتصالح بها ، وبنتبادل بها مصالحنا ، وبننجز بها أعمالنا ..تجاره..نجاره..حداده..كل أشغالنا بنعملها بلغتنا العامية الجميلة ، ولو حاولنا نعمل كل الحاجات دي باللغة العربية الفصحي لا هانروح ولا نيجي ، حياتنا هاتنشف وهاتتعقد وهاتتكلكع لأنها مش لغتنا ، وإن جيت للحق معرفتنا باللغه العربية الفصحي زي معرفتنا باللغة اليابانية ،
علاقتنا بالشعوب العربية اتكونت بواسطة لغتنا العامية ، الحب والألفة بينا وبين العرب شرقا وغربا اتعملوا بلغتنا العامية عن طريق الفن...غنا..وأفلام...وفنون مختلفة ، أنا شخصيا لما كنت في إحدي البلدان العربية ظنيت إن محدش هايفهمني هناك إلا لما اتكلم بالفصحي لكني فوجئت مع أول واحد بكلمه لقيته بيقولي كلمني بالمصري.
إحنا كشعب معرفناش نجيب محفوظ إلا من أفلامه مش من كتبه ، ولو سألت أي مصري في حاره عن طه حسين هايقولك معرفوش ، وأنا متهيألي إن اللغة العربية الفصحي هي واحدة من مشاكل التعلم عندنا، أو هي واحدة من أسباب عزوف المصريين عن القراءة ، بل إن كتير من مشاكل الاستيعاب تكمن في اللغة العربية الفصحي ، التلميذ في كتير من الأحيان ما بيعرفش يقرا كويس ، وبالتالي ما بيقدرش يفهم المكتوب كويس وبعدين إحنا نظلمه ونتهمه بالغباء ، لكن المشكله مش فيه هو إنما المشكله في إنه بيتعامل مع لغه مش لغته.
في امتحانات الشهادات بيجي دايما سؤال يقول هات مرادف كلمة كذا ، يعني هات معني الكلمه دي ، السؤال ده هو نفسه السؤال إللي بيجي في مادة الانجليزي يطلب من التلميذ ترجمة كلمة معينه ، يعني لما أقولك هات مرادف معناها إني بقولك ترجم ، وأنا شخصيا لما تصديت لتبسيط كتاب ( البخلاء ) بتاع الجاحظ لقيت نفسي محتاج لترجمة الكتاب الأول قبل تبسيطه ، وبالفعل كنت محتاج لقاموس مميز علشان اعرف أترجم مضمون الكتاب قبل تبسيطه علشان الأولاد يعرفوا يقروه.
دا مش معناه إن اللغة العربية الفصحي وحشه ، أبدا ، فهي لغة العلوم والآداب والمعارف المختلفة ، لكن يمكن يكون الحاجز بين بعض الشعراء والأدباء والمفكرين وبين القراء هو محاولة التقعر والفذلكة وإظهار مدي التمكن من أسرار اللغة العربية الفصحي ، ويمكن يكون شهرة البعض من أمثال صلاح جاهين وفؤاد حداد وأحمد فؤاد نجم والأبنودي وأمل دنقل وصلاح عبد الصبور ويوسف إدريس وغيرهم هو أنهم كتبوا بالعامية أو بالفصحي المتباسطة القريبة من العامية التي تصل بسهولة إلي قلب القراء.
العامية هي لغتنا ، وهي جميلة ، ودسمة ، وهي مخزون معارفنا ، وهي التي ميزتنا بروح الفكاهة والمرح ، وهي التي صنعنا بها أمثالنا المليئة بالحكمة ، وهي التي منحتنا القدرة علي النقد ومعارضة السلطات وجلد أنفسنا أحيانا بواسطة النكتة التي تجعلك تضحك حتي تبتل عيناك بالدموع ، وهي التي تحتوي علي قيمنا ومثلنا الإنسانية الرفيعة.





التعليق والتصويت على الموضوع في الموقع الرئيسي


اخر الافلام

.. بعد انتخابات -تاريخية-.. لا أغلبية مطلقة في البرلمان الفرنسي

.. احتفالات بالانتصار.. -الجبهة الشعبية الجديدة- تتصدر التشريعي



.. -سأقدم استقالتي-.. كلمة رئيس الوزراء الفرنسي غابرييل أتال ب

.. سمكة قرش ضخمة تسبح قرب مرتادي شاطىء في تكساس




.. بايدن.. مصيبة أميركا العظمى! والدولة العميقة تتحرك! | #التا